मन्त्री निशा मेहताद्वारा प्रादेशिक अस्पतालको अनुगमन, स्वास्थ्य सेवा सुधारमा जोड
जनकपुरधाम । मधेश प्रदेशकी स्वास्थ्य तथा खाद्य स्वच्छतामन्त्री निशा मेहताले जनकपुरधामस्थित प्रादेशिक अस्पतालको अनुगमन तथा निरीक्षण गरेकी छन् ।
मंगलबार अस्पताल पुगेकी मन्त्री मेहताले विभिन्न विभाग, उपचार कक्ष, आकस्मिक सेवा तथा अस्पतालमा उपलब्ध स्वास्थ्य सुविधाको अवस्थाबारे जानकारी लिएकी हुन् ।
अनुगमनका क्रममा मन्त्री मेहताले अस्पतालमा उपचारका लागि आउने सर्वसाधारणले सहज, सुलभ र गुणस्तरीय स्वास्थ्य सेवा पाउनुपर्नेमा जोड दिइन् ।
सरकारी अस्पतालप्रति नागरिकको विश्वास अभिवृद्धि गर्न स्वास्थ्य सेवामा सुधार, चिकित्सक तथा स्वास्थ्यकर्मीको जिम्मेवार कार्यसम्पादन र सेवाग्राहीमैत्री वातावरण निर्माण आवश्यक रहेको उनले बताइन् ।
अस्पतालमा देखिएका समस्या तथा सेवा प्रवाहका क्रममा उत्पन्न हुने चुनौती पहिचान गरी तिनको समाधानका लागि सम्बन्धित निकायलाई आवश्यक पहल गर्न निर्देशनसमेत दिइएको बताइएको छ ।
स्वास्थ्य सेवा नागरिकको आधारभूत आवश्यकता भएकाले उपचारका लागि अस्पताल पुग्ने कुनै पनि बिरामीले अनावश्यक सास्ती बेहोर्न नपरोस् भन्ने विषयमा प्रदेश सरकार गम्भीर रहेको मन्त्री मेहताको भनाइ थियो ।
मन्त्रीको अनुगमनलाई प्रादेशिक अस्पतालको सेवा प्रवाहलाई थप प्रभावकारी, व्यवस्थित र गुणस्तरीय बनाउने प्रयासका रूपमा हेरिएको छ ।

















Discussion about this post