जनकपुरधाम/मंसिर १ गते। १५औँ राष्ट्रिय कर दिवसको अवसरमा आन्तरिक राजस्व कार्यालय जनकपुरधामले करसम्बन्धी जनचेतना अभिवृद्धि गर्ने उद्देश्यले प्रभातफेरी कार्यक्रम आयोजना गरेको छ ।
करको महत्वबारे नागरिकलाई जानकारी गराउने, समयमै कर तिर्ने संस्कारको विकास गर्ने तथा कर सहभागिता बढाउने लक्ष्यसहित प्रभातफेरी निकालिएको हो ।
प्रभातफेरीमा आन्तरिक राजस्व कार्यालयका कर्मचारी, विभिन्न सरकारी तथा गैरसरकारी निकायका प्रतिनिधि, उद्योगी, व्यवसायी तथा अन्य सरोकारवालाहरूको सहभागिता रहेको थियो ।
कार्यक्रममार्फत समयमै कर तिर्ने बानीको विकास, कर प्रणालीप्रति नागरिकको विश्वास अभिवृद्धि तथा जिम्मेवार करदाता निर्माणको सन्देश प्रवाह गरिएको आन्तरिक राजस्व कार्यालय जनकपुरधामका निमित्त कार्यालय प्रमुख चन्दन कर्णले जानकारी दिए ।
उनका अनुसार राष्ट्रको आर्थिक विकास, पूर्वाधार निर्माण तथा सार्वजनिक सेवा प्रवाहलाई प्रभावकारी बनाउन कर राजस्वको महत्वपूर्ण योगदान रहँदै आएको छ । त्यसैले प्रत्येक नागरिक तथा व्यवसायीले करप्रतिको आफ्नो दायित्व र जिम्मेवारी बुझ्न आवश्यक रहेको उनले बताए ।
राष्ट्रिय कर दिवसले करदाता र कर प्रशासनबीचको सम्बन्धलाई थप सुमधुर बनाउनुका साथै स्वेच्छिक कर सहभागिता अभिवृद्धि गर्न महत्वपूर्ण भूमिका खेल्ने अपेक्षा गरिएको छ ।
कर प्रणालीलाई पारदर्शी, प्रभावकारी र नागरिकमैत्री बनाउन कर प्रशासन तथा करदाताबीच सहकार्य आवश्यक रहेको सन्देशसमेत प्रभातफेरीमार्फत प्रवाह गरिएको छ ।

















Discussion about this post