जनकपुरधाममा झु ण्डिएको अवस्थामा भेटिएकी आरतीको ह त्या गरिएको दाबी, सासू-ससुरा र श्रीमान्‌विरुद्ध जाहेरी

जनकपुरधाम/जेठ ९ गते । धनुषाको जनकपुरधाम उपमहानगरपालिका-९ स्थित एक घरमा झु ण्डिएको अवस्थामा भेटिएकी युवतीको ह त्या गरिएको माइती पक्षले दाबी गरेका छन् ।

आइतबार बेलुका २२ वर्षीया आरती साहको शव झुण्डिएको अवस्थामा भेटिएको थियो । तत्काल काब्या अस्पताल अस्पताल लगिएकोमा उनको मृत्यु भइसकेको जनाएपछि शव पोष्टर्माटका लागि प्रादेशिक अस्पताल पुर्‍याइएको थयियो । आरतीको शवको अहिले पनि अस्पतालमै छ ।

माइत पक्षले आरतीको आत्महत्या नभएर हत्या गरिएको दाबी गरेका छन् । दुई वर्षअघि सामाजिक परम्परा अनुसार आरतीको विवाह मिथिला विहारी नगरपालिका-३ का मोतीबाबु साहसँग भएको थियो ।

दाइजोको निहुँमा छोरीको हत्या गरेको दाबीसहित नगराइन नगरपालिका-८ का विनोदप्रसाद साहले श्रीमान् मोतीबाबु, देवर रवि, ससुरा मोहन र सासू रेणुविरुद्ध धनुषा प्रहरीमा किटानी जाहेरी दिएका छन् । प्रहरीले उजुरी दर्ता गरेको छैन ।

उनले उजुरीमा छोरी आरतीको विवाहमा २५ लाख रूपैयाँ खर्च गरेको दाबी गर्दै भनेका छन्, ‘थप दाइजोका लागि पटक-पटक यातना दिँदै आएको थियो ।’

आरतीको शरीरको विभिन्न भागमा निलडाम देखेपछि घटनास्थल पुगेको र त्यहाँ पुग्दा कुटपिट गरी ज्यान मारेको स्थानीयबाट खुल्न आएको उजुरीमा दाबी गरिएको छ ।

ज्वाइ मोतीबाबुको काठमाण्डुमा अर्कै महिलासँग सम्बन्ध रहेको र आरतीलाई सोबारे जानकारी भएपछि श्रीमान श्रीमतीबीच पटक पटक विवाद हुँदै आएको जानकारी दिए । ईञ्जिनियर भनेर छोरीको विहे मोतीबाबुसंग गरेको भए पनि उनी भने दलालको काम गर्दै आएको कुरा आफूहरुले पछिबाट थाहा पाएको उल्लेख गरे । यता, मृतकका श्रीमान मोतीबाबु साहले आइतबार आरतीको स्वास्थ्य अवस्था खराब रहेको र खाना खानको लागि आग्रह गर्दा उनी रिसाएको र सो क्रममा मैले एक झापड हिर्काएर घरबाट बाहिर हिंडेको बताए । साँझ घर फर्केर आउँदा आरती झुण्डिएको अवस्थामा देखेको उनले बताए ।

यसैबीच, जिल्ला प्रहरी कार्यालय धनुषाका प्रवक्ता प्रहरी नायव उपरीक्षक वेदप्रसाद गौतमले पोष्मार्टम रिपोर्ट नआउँदासम्म हत्या हो कि आत्महत्या भनेर भन्न नसकिने भएको बताए । अनुसन्धान जारी रहेको भन्दै उनले भने,‘पीडित पक्षले कर्तव्य ज्यान मुद्दा दर्ता गर्नका लागि आन्दोलन गरिरहनु भएको छ तर हामीले पोष्टमार्टम रिपोर्ट आउनु अघि आत्महत्या दुरुत्साहनको मुद्दा चलाउने भनेको छौं।’ यसैबीच, प्रहरीले मृतकका श्रीमान मोतीबाबु र ससुरा मदन मोहन साहलाई नियन्त्रणमा लिएर अनुसन्धान अगाडि बढाएको उनले जानकारी दिए । अनुसन्धान गर्दै जाँदा फेरि कर्तव्य ज्यानकै प्रमाण फेला परेपछि अर्कै मुद्दा चलाउन सकिन्छ भन्दै उनले अहिलेलाई आत्महत्या दुरुत्साहन मुद्दा दर्ता गरी अनुसन्धान गरिने बताए ।

त्यस्तै,आरतीको परिवारजनले जिल्ला प्रहरी कार्यालय गाडि अबेर साँझसम्म कर्तव्य ज्यान मुद्दा दर्ता हुनुपर्छ भन्दै विरोध प्रदर्शन जारी राखेका थिए । दर्जनौको संख्यामा रहेका आरतीका परिवारजन तथा छिमेकीहरुले जिल्ला प्रहरी कार्यालय अगाडि करीब एक घण्टा चक्का जामसमेत गरेका थिए । सो क्षेत्रको सुरक्षा अवस्था कडा बनाइएको थियो ।