गिरिजानन्द/धनुषा/जेठ २२ गते। विश्व वातावरण दिवसको अवसरमा जनकपुरधाम–४, विश्वकर्मा चोकस्थित संस्कृति विद्या मन्दिरले वातावरण संरक्षण तथा प्रदूषण न्यूनीकरण सम्बन्धी जनचेतना फैलाउने उद्देश्यले शुक्रबार सचेतनामूलक र्याली आयोजना गरेको छ।
विद्यालयका विद्यार्थीहरूले आफ्नै हातले तयार गरेका विभिन्न सन्देशमूलक प्लेकार्ड बोकेर विद्यालय परिसरबाट जनकचोकसम्म र्याली प्रदर्शन गरेका थिए। हाम्रो पृथ्वी,हाम्रो दायित्व र भविष्यको नारा सहित र्यालीमा सहभागी विद्यार्थीहरूले पानी बचाऔ,रियुज रिसाईकलमा कमी ल्याऔ,उर्जा बचाऔ “वातावरण बचाऔँ, भविष्य सुरक्षित बनाऔँ”, “प्रदूषण घटाऔँ, हरियाली बढाऔँ”, “स्वच्छ वातावरण, स्वस्थ जीवन”लगायतका नारासहित वातावरण संरक्षणको सन्देश दिएका थिए।
विद्यालयबाट सुरु भएको र्याली नगरका विभिन्न क्षेत्र हुँदै जनकचोक पुगेर समापन गरिएको थियो। र्यालीपश्चात जनकचोकस्थित जनक मन्दिरको प्राङ्गणमा विद्यार्थीहरूले वातावरण संरक्षणको महत्व, बढ्दो प्रदूषणका असर तथा त्यसको नियन्त्रणका उपायबारे मन्तव्य प्रस्तुत गरेका थिए।
कार्यक्रममा बोल्दै विद्यार्थीहरूले वातावरणीय सन्तुलन कायम राख्न वृक्षारोपण, प्लास्टिकजन्य वस्तुको प्रयोगमा कमी, फोहोरको उचित व्यवस्थापन तथा प्राकृतिक स्रोतहरूको संरक्षण आवश्यक रहेको बताए। उनीहरूले वातावरण संरक्षणको जिम्मेवारी केवल सरकार वा कुनै संस्थाको मात्र नभई प्रत्येक नागरिकको साझा दायित्व भएको उल्लेख गरे।
विद्यालयका कोर्डिनेटर प्रियल झाले पछिल्लो समय वातावरण प्रदूषणको समस्या दिनप्रतिदिन गम्भीर बन्दै गएको भन्दै त्यसप्रति बालबालिकादेखि नै सचेतना अभिवृद्धि गर्न कार्यक्रम आयोजना गरिएको जानकारी दिए। उनले यस्ता गतिविधिले विद्यार्थीहरूमा वातावरणप्रति जिम्मेवारीबोध विकास हुनुका साथै समाजमा सकारात्मक सन्देश प्रवाह हुने विश्वास व्यक्त गरे।
विद्यालयले विश्व वातावरण दिवसको अवसरमा आयोजना गरेको उक्त कार्यक्रमले विद्यार्थीहरूलाई वातावरणीय मुद्दाप्रति संवेदनशील बनाउनुका साथै समुदायमा पनि संरक्षणसम्बन्धी चेतना फैलाउन महत्वपूर्ण योगदान पुर्याएको सहभागीहरूले बताएका छन्।
Discussion about this post