जनकपुरधाम/कार्तिक १४ गते । धनुषाको नगराइन नगरपालिका–७ देवडिहाबाट दस दिनअघि बेपत्ता भएका सात वर्षीय बालक साकेत झाको शव क्षतविक्षत अवस्थामा फेला परेको छ।
विजयादशमीकै दिन गत कार्तिक ४ गते घरबाट निस्किएपछि बेपत्ता भएका स्थानीय अजय झाका छोरा साकेतको शव शनिबार फेला परेको हो।
जिल्ला प्रहरी कार्यालय धनुषाका प्रवक्ता प्रहरी नायब उपरीक्षक (डीएसपी) ओमप्रकाश खनालका अनुसार बालक हराएको स्थानबाट करिब दुई किलोमिटर उत्तरतर्फ रहेको धान खेतमा उनको शव क्षतविक्षत अवस्थामा फेला परेको हो।
साकेत घरबाट निस्किएपछि परिवारजन र प्रहरीले निरन्तर खोजी गर्दै आएका थिए। खोजीका क्रममा आसपासका गाउँबस्ती, पोखरी तथा झाडीहरूमा समेत व्यापक रूपमा खोजतलास गरिएको थियो। तर, दस दिनसम्म बालकको अवस्था पत्ता लाग्न सकेको थिएन।
लामो खोजीपछि शनिबार धान खेतमा शव फेला परेसँगै घटनाले नयाँ मोड लिएको छ। बालकको मृत्यु कसरी भयो र घटनामा कुनै आपराधिक संलग्नता छ वा छैन भन्ने विषयमा प्रहरीले अनुसन्धान अघि बढाएको छ।
जिल्ला प्रहरी कार्यालय धनुषाले घटनाबारे थप अनुसन्धान भइरहेको जनाएको छ। बालकको मृत्युको कारण र घटनाको वास्तविक विवरण भने खुल्न बाँकी छ।
विजयादशमीको दिनदेखि बेपत्ता भएका बालकको शव फेला परेपछि देवडिहा गाउँ शोकमा डुबेको छ। घटनाले स्थानीयवासीलाई स्तब्ध बनाएको छ।
Discussion about this post