भ्रामक प्रचारको प्रधानाध्यापक पवन मण्डलद्वारा खण्डन, विद्यालयको सफलता सामूहिक प्रयासको परिणाम

धनुषा/जेठ २२। धनुषाको विदेह नगरपालिका–स्थित गिद्धा बेलापट्टीमा रहेको श्री जनता नमूना माध्यमिक विद्यालयका प्रधानाध्यापक पवन मण्डलले आफ्नो विषयमा सामाजिक सञ्जाल तथा केही सञ्चारमाध्यममा प्रकाशित सामग्रीहरू तथ्यहीन, भ्रामक र कपोलकल्पित रहेको बताएका छन्।

बिहीबार आयोजित पत्रकार सम्मेलनमा बोल्दै प्रधानाध्यापक मण्डलले विद्यालयको विकास र उपलब्धि कुनै एक व्यक्तिको प्रयासबाट नभई नागरिक समाज, शिक्षक, अभिभावक, स्थानीय सरकार तथा सम्पूर्ण सरोकारवालाहरूको साझा योगदानबाट सम्भव भएको बताए।

उनले विद्यालयले गुणस्तरीय शिक्षा प्रदान गर्दै प्रतिस्पर्धी जनशक्ति उत्पादन गरिरहेको उल्लेख गर्दै शिक्षा मार्फत समाजमा विद्यमान कुरीति, अन्धविश्वास, अशिक्षा तथा गरिबी न्यूनीकरणमा समेत सकारात्मक योगदान पुर्‍याइरहेको बताए। आफू लामो समयदेखि शिक्षण पेशामा समर्पित रहँदै विद्यालयको शैक्षिक सुधारका लागि निरन्तर सक्रिय रहेको उनको भनाइ थियो।

प्रधानाध्यापक मण्डलले विदेह नगरपालिकाबाट विद्यालयमा १४ जना नगर शिक्षक उपलब्ध गराइएको जानकारी दिँदै नगरप्रमुख बेचन दाससँग आफ्नो पुरानो सहपाठीको सम्बन्ध रहेको स्पष्ट पारे। सामाजिक सञ्जालमा नगरप्रमुखलाई गालीगलौज गरेको भन्ने आरोपको खण्डन गर्दै उनले त्यस्तो व्यवहार गर्ने कल्पना समेत गर्न नसकिने बताए।

“नगरप्रमुख बेचन दास मेरा सहपाठी हुन्। उहाँप्रति अभद्र व्यवहार गर्ने कुरा कल्पना पनि गर्न सकिँदैन,” मण्डलले भने।

यसै विषयमा नगरप्रमुख बेचन दासले पनि प्रधानाध्यापक मण्डलले आफूलाई कुनै प्रकारको गालीगलौज नगरेको स्पष्ट पार्दै सामाजिक सञ्जालमा प्रसारित केही सामग्री वास्तविकतासँग मेल नखाने बताएका छन्।

प्रधानाध्यापक मण्डलले विद्यालयको शैक्षिक विकासमा पुर्‍याएको योगदानका आधारमा आफू राष्ट्रपतिबाट सम्मानित भएको उल्लेख गर्दै नमूना विद्यालय निर्माणको अभियानलाई अझ प्रभावकारी बनाउने प्रतिबद्धता व्यक्त गरे। साथै, पत्रकारिताको मूल धर्म निष्पक्षता रहेको उल्लेख गर्दै आफू कहिल्यै पत्रकारविरोधी नरहेको बताए।

कार्यक्रममा विद्यालयका संस्थापक तथा जग्गादाता परिवारका प्रतिनिधि एवं कन्या माध्यमिक विद्यालयका पूर्वप्रधानाध्यापक पशुपति मण्डलले विद्यालयको समग्र विकासमा प्रधानाध्यापक पवन मण्डलको नेतृत्व महत्वपूर्ण रहेको बताए। उनले विद्यालयलाई यस क्षेत्रकै निःशुल्क अंग्रेजी माध्यममा अध्यापन हुने एकमात्र सरकारी विद्यालयका रूपमा स्थापित गर्न मण्डलको उल्लेखनीय भूमिका रहेको धारणा राखे।

पशुपति मण्डलले पूर्व शिक्षाविद् महावीर पुनले समेत विद्यालयको शैक्षिक वातावरण, पठन–पाठन प्रणाली तथा नेतृत्वको प्रशंसा गरेको स्मरण गराउँदै विद्यालयले हासिल गरेका उपलब्धिहरू वास्तविक मूल्याङ्कनको आधारमा प्राप्त भएको बताए। विद्यालयको गुणस्तर अभिवृद्धि र शैक्षिक सुधारका लागि निरन्तर प्रयास जारी रहेको उनको भनाइ थियो।