गिरिजानन्द साह/धनुषा/जेठ १९ गते। जनकपुरको जिरोमाइलस्थित फलफूल तथा तरकारी बजार खाली गराउने प्रक्रियाप्रति असन्तुष्टि जनाउँदै जनकपुर फलफूल तथा तरकारी व्यवसायी संघले आन्दोलनमा उत्रिन बाध्य भएको जनाएको छ।
संघले मंगलबार पत्रकार सम्मेलन गरेर पुनरावेदन अदालत जनकपुरको आदेशअनुसार जिरोमाइलस्थित फलफूल बजार खाली गर्ने प्रक्रियालाई सम्मानपूर्वक स्वीकार गरेको र सोहीअनुसार थोक फलफूल व्यवसायीहरू स्वस्फूर्त रूपमा बजार खाली गर्न तयार रहेको जानकारी दिएको छ।
तर, सम्बन्धित सरकारी निकायहरूले व्यवसायीहरूका लागि कुनै वैकल्पिक व्यवस्था नगरेको अवस्थामा आफ्नो व्यापार तथा रोजगारी त्यागेर बजार खाली गर्नुपरेको संघको महासचिव भुवनेश्वर पुर्वेले गुनासो गरेको छ। उनका अनुसार पटक–पटक जिल्ला प्रशासन कार्यालय, जनकपुरधाम उपमहानगरपालिका, प्रहरी प्रशासन, जनप्रतिनिधि तथा अन्य सरोकारवाला निकायसँग सुरक्षित स्थानान्तरण, उचित समय र अनुकूल वातावरणको माग गरिएको थियो।
पत्रकार सम्मेलनमा कानुनी प्रक्रिया तथा आवश्यक औपचारिक जानकारी नदिई डोजर प्रयोग गरी व्यवसायीहरूले निर्माण गरेका टहरा तथा संरचनाहरू भत्काउने प्रयास गरिएको आरोप लगाइएको छ। यस्तो व्यवहारका कारण व्यवसायीहरू आन्दोलनमा उत्रिन बाध्य भएको संघले जनाएको छ।
संघले फलफूल तथा तरकारी व्यवसाय कृषि क्षेत्रसँग प्रत्यक्ष रूपमा जोडिएको सेवा तथा वितरण क्षेत्र भएकाले यसलाई नेपाल सरकार, मधेश प्रदेश सरकार तथा स्थानीय सरकारको प्राथमिकतामा राखिनुपर्ने पत्रकार सम्मेलनमा जानकारी गराएको छ । तर, व्यवसायीहरूका लागि कुनै सरकारी बजार वा वैकल्पिक व्यवस्थापन नहुँदा उनीहरू लामो समयदेखि समस्यामा रहेको महासचिव पुर्वेले बताए ।
उनका अनुसार यस व्यवसायबाट प्रत्यक्ष रूपमा करिब २७० जना रोजगारीमा आबद्ध छन् भने अप्रत्यक्ष रूपमा हजारौं परिवारको जीविकोपार्जन जोडिएको छ। त्यसैले बजारको सुरक्षित व्यवस्थापन, उचित स्थानान्तरण तथा दीर्घकालीन प्रवर्द्धनका लागि आवश्यक पहल गर्न संघले सरकार, जनप्रतिनिधि, नागरिक समाज तथा सञ्चारमाध्यमसँग आग्रह गरेको छ।
पत्रकार सम्मेलनमा संघका व्यवसायीहरूको समस्या समाधान गरी वैकल्पिक व्यवस्थासहित स्थानान्तरण प्रक्रिया अघि बढाउन सम्बन्धित निकायहरूको ध्यानाकर्षण गराइएको छ।
Discussion about this post