धनुषामा विभिन्न कार्यक्रम गरी १९ औँ गणतन्त्र दिवस मनाइयो

धनुषा/जेठ १९ गते। १९ औँ गणतन्त्र दिवस जनकपुरधाममा शुक्रबार विभिन्न रचनात्मक कार्यक्रमहरू गरेर मनाइएको छ।

मधेस प्रदेशका मुख्यमन्त्रीको अध्यक्षतामा गठित प्रदेश स्तरीय गणतन्त्र दिवस मूल समारोह समितिको आह्वानमा शुक्रबार बिहान मधेस भवन परिसरभित्र रहेका विभिन्न मन्त्रालयहरूमा विशेष सरसफाइ कार्यक्रम आयोजना गरिएको छ। यसैगरी, मधेस प्रदेशको स्वास्थ्य तथा जनसङ्ख्या मन्त्रालयको अगुवाइमा प्रदेशका आठवटै जिल्लामा बृहत् रक्तदान कार्यक्रम समेत सम्पन्न भएको छ।

गठित समितिको कार्यतालिका अनुसार खेलकुद तथा समाजकल्याण मन्त्रालयको अगुवाइमा मानव सेवा आश्रमका आश्रितहरूलाई निःशुल्क भोजन गराइएको छ भने ऊर्जा, सिँचाइ तथा खानेपानी मन्त्रालयद्वारा विभिन्न क्षेत्रमा सरसफाइ गरिएको मधेस प्रदेशको गृह, सञ्चार तथा कानुन मन्त्रालयले जनाएको छ।

यता, जिल्ला गणतन्त्र दिवस मूल समारोह समिति धनुषाको आयोजनामा धनुषामा पनि भव्य रूपमा दिवस मनाइएको छ। जिल्ला समन्वय समिति धनुषाको सभाहलमा आयोजित विशेष कार्यक्रममा सहभागी वक्ताहरूले गणतन्त्रको असल अभ्यासले मात्र मुलुकमा दिगो शान्ति र आर्थिक समृद्धि स्थापना गर्न मद्दत पुग्नेमा जोड दिनुभयाे।

कार्यक्रममा बोल्नुहुँदै धनुषाका प्रमुख जिल्ला अधिकारी प्रेम प्रसाद लुइँटेलले जनताको ठूलो सङ्घर्ष र बलिदानको जगमा स्थापना भएको गणतन्त्रले आम नागरिकलाई रैतीबाट देशको मालिक बनाउने काम गरेको बताउनुभयो। उहाँले गणतन्त्रको व्यावहारिक अभ्यासका क्रममा देखिएका कमीकमजोरीहरूलाई सच्याउँदै एकजुट भएर अगाडि बढ्नुको विकल्प नरहेको उल्लेख गर्नुभयो।

जिल्ला समन्वय समिति धनुषाकी उपप्रमुख सङ्गीता देवी ठाकुरको अध्यक्षतामा सम्पन्न सो कार्यक्रममा स्थानीय तहका प्रतिनिधि तथा विभिन्न सुरक्षा निकायका प्रमुखहरूको उपस्थिति रहेको थियो। कार्यक्रममा नेपाली सेना, नेपाल प्रहरी र सशस्त्र प्रहरी बल गरी तीनवटै सुरक्षा अङ्गले झन्डोत्तोलन गर्दै सलामी अर्पण गरेका थिए।