जनकपुरधाममा एआई फर मोडर्न जर्नालिज्न सम्बन्धी तालिम

गिरिजानन्द साह/धनुषा/जेठ ९ गते ।जनकपुरधाममा एआई (कृत्रिम बुद्धिमत्ता) आधारित मोडर्न जर्नालिज्म सम्बन्धी तालिम सम्पन्न भएको छ। सञ्चार क्षेत्रमा प्रविधिको बढ्दो प्रयोगलाई मध्यनजर गर्दै आयोजना गरिएको तालिममा धनुषाका विभिन्न सञ्चारमाध्यममा कार्यरत १५ जना सञ्चारकर्मीहरुको सहभागिता रहेको थियो।

तालिममा पत्रकारितामा एआईको प्रयोग, डिजिटल सामग्री निर्माण, समाचार लेखनमा आधुनिक प्रविधिको उपयोग, तथ्य परीक्षण, सामाजिक सञ्जाल व्यवस्थापन तथा मल्टिमिडिया पत्रकारिताका विषयमा नेक्सेलरिज टेकका सिईओ विवेक कुमार साहले प्रशिक्षण दिएका थिए । तालिम नेक्सेलरिज टेकको आयोजनामा तथा आसमान नेपाल,भुमिजा फाउन्डेसन र नेपाल पत्रकार महासंघ धनुषा को सहयोगमा सम्पन्न भएको हो।

पत्रकार महासंघ धनुषाको अध्यक्ष पुरन साह ले एआई मोडर्न जर्नालिजम सम्बन्धी तालिमले सञ्चारकर्मीहरुलाई आधुनिक प्रविधिसँग जोड्न महत्वपूर्ण भूमिका खेल्ने बताएका छन्। साथै उनले यस्ता तालिमले स्थानीय सञ्चारकर्मीहरुको क्षमता अभिवृद्धिमा सकारात्मक योगदान पुग्ने विश्वास व्यक्त गर्दै आगामी दिनमा पनि यस्ता तालिमलाई १ दिनको समयले नपुग्ने भएकोले यसलाई बढाएर २ वा ३ दिने तालिम आयोजना गर्ने बताए।

तालिममा सहभागी सञ्चारकर्मीहरुले एआई प्रविधिले पत्रकारितालाई अझ प्रभावकारी, छिटो र तथ्यपरक बनाउन सहयोग पुग्ने विश्वास व्यक्त गरेका छन्। साथै सहभागीहरुले सञ्चारकर्मीहरुको क्षमता अभिवृद्धिका लागि यस्ता प्रविधिमैत्री तालिमले निकै सहयोग पुग्ने बताएका छ्न । प्रविधिको सही प्रयोगसँगै पत्रकारिताको विश्वसनीयता कायम राख्नुपर्नेमा पनि जोड दिइएको थियो।