गिरिजानन्द साह/धनुषा/जेठ ५ गते। धनुषाको जनकपुरधाम मा लैङ्गिक हिंसा कार्यक्रम तथा प्रतिकार्य कार्य योजनाको प्रभावकारी कार्यान्वयनका लागि लैङ्गिक हिंसा रोकथाम तथा नियन्त्रण सञ्जाल, समुदायमा आधारित संघ/संस्था तथा चेन एजेन्सीबीच समन्वय बैठक सम्पन्न भएको छ।
दिव्य विकास स्रोत केन्द्रद्वारा आयोजित बैठक सुरक्षा तथा न्याय कार्यक्रमका परियोजना प्रबन्धक गणेश ठकुरीको अध्यक्षतामा सम्पन्न भएको हो। कार्यक्रममा स्थानीय सरकार, लैङ्गिक हिंसा रोकथाम तथा नियन्त्रण सञ्जाल, समुदायमा आधारित संघ/संस्था तथा विभिन्न सेवा प्रदायक निकायका प्रतिनिधिहरूको सहभागिता रहेको थियो।
बैठकमा लैङ्गिक हिंसा रोकथाम तथा प्रतिकार्य योजनाको प्रभावकारी कार्यान्वयनका लागि सरोकारवाला निकायहरूबीच समन्वय सुदृढ गर्ने विषयमा विशेष छलफल गरिएको थियो। साथै स्थानीय सरकार, समुदायमा आधारित संघ/संस्था तथा चेन एजेन्सीहरूको भूमिका, कर्तव्य र जिम्मेवारीबारे समेत व्यापक छलफल भएको थियो।
कार्यक्रममा लैङ्गिक हिंसा सम्बन्धी सेवा प्रदायक तथा रिफरल प्रणालीलाई प्रभावकारी बनाउने, सरोकारवाला निकायहरूबीच साझा बुझाइ, सहमति तथा उत्तरदायित्वको भावना विकास गर्ने तथा स्थानीय तहद्वारा तयार गरिएको लैङ्गिक हिंसा रोकथाम तथा प्रतिकार्य योजनाको कार्यान्वयनमा सहजीकरण गर्ने विषयमा पनि जोड दिइएको थियो।
त्यसैगरी आगामी आर्थिक वर्ष २०८३/०८४ को स्थानीय तहको योजना तथा बजेटमा लैङ्गिक हिंसा रोकथाम तथा प्रतिकार्य कार्यक्रम समावेश गराउन आवश्यक वकालत गर्ने तथा समुदाय स्तरमा लैङ्गिक हिंसा न्यूनीकरणका लागि संयुक्त पहल थालनी गर्ने विषयमा समेत छलफल भएको दिव्य विकास स्रोत केन्द्रका परियोजना अधिकृत जागेश्वर यादवले जानकारी दिए।
बेलायत सरकारको आर्थिक सहयोग, पिपुल इन निड को नेतृत्व तथा दिव्य विकास स्रोत केन्द्र पर्साको साझेदारीमा मधेश प्रदेशका विभिन्न स्थानीय तह तथा विद्यालयहरूमा “सुरक्षा र न्याय कार्यक्रम” अन्तर्गत लैङ्गिक हिंसा रोकथाम तथा प्रतिकार्य सम्बन्धी कार्यक्रम सञ्चालन हुँदै आएको जनाइएको छ।
Discussion about this post