जनकपुरधाम स्थित प्रादेशिक अस्पतालका चिकित्सक माथि हातपात गरेको आरोपमा दुई जना पक्राउ

धनुषा/असोज ५ गते । जनकपुरधामस्थित प्रादेशिक अस्पतालको बर्थिङ सेन्टरमा कार्यरत चिकित्सक डा. सरोज साहमाथि हातपात गरेको आरोपमा प्रहरीले दुई जनालाई पक्राउ गरेको छ।

पक्राउ पर्नेमा धनुषाको औरही गाउँपालिका–२ का २० वर्षीय विजय मुखिया र जनकपुरधाम उपमहानगरपालिका–४ का २६ वर्षीय सुधिर मुखिया बिन रहेका छन्।

प्रहरीका अनुसार गत असोज १ गते साँझ जनकपुरधाम उपमहानगरपालिका–१० स्थित मधेश स्वास्थ्य विज्ञान प्रतिष्ठानअन्तर्गत प्रादेशिक अस्पताल जनकपुरको बर्थिङ सेन्टरमा बर्थिङका लागि आएकी एक महिलाका आफन्तले कार्यरत चिकित्सक डा. साहमाथि हातपात गरेका थिए।

घटनापछि प्रहरी टोलीले अनुसन्धान गर्दै घटनामा संलग्न रहेको आरोपमा दुवै जनालाई पक्राउ गरेको धनुषाका प्रहरी प्रवक्ता डीएसपी ओमप्रकाश खनालले जानकारी दिए।

पक्राउ परेका दुवै जनालाई जिल्ला अदालत धनुषाबाट तीन दिनको म्याद थप गरी स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ को दफा ३ (ग) बमोजिम अनुसन्धान भइरहेको प्रहरीले जनाएको छ।

घटनामा संलग्न अन्य व्यक्तिहरूको पनि खोजतलास भइरहेको जिल्ला प्रहरी कार्यालय धनुषाले जनाएको छ।

प्रहरीका अनुसार स्वास्थ्यकर्मीमाथि कसुर गर्ने व्यक्तिलाई प्रचलित कानुनबमोजिम तीन वर्षसम्म कैद वा तीन लाख रुपैयाँसम्म जरिवाना वा दुवै सजाय हुन सक्ने व्यवस्था रहेको छ।