जनकपुरधाम/भदौ २६ गते । जनकपुरधामको रेलवे स्टेशनमा आयोजित कृष्ण जन्माष्टमी पूजा सकेर मूर्ति विसर्जन गर्ने क्रममा भएका घटनालाई लिएर विवाद उत्पन्न भएको छ। पूजा समितिका अध्यक्ष शत्रुधन साहको कार्यशैलीको विरोध गर्दा समितिका पदाधिकारी तथा सदस्यहरूविरुद्ध मुद्दा दर्ता गरिएको भन्दै समितिले आपत्ति जनाएको छ।
समितिले शुक्रवार एक पत्रकार सम्मेलनमार्फत समितिका अध्यक्ष शत्रुधन साहको गैरजिम्मेवार कार्यको विरोध गर्दा समितिका सहसचिव तथा सदस्य सहित तीनजनालाई कानुनी कारबाहीको सिफारिस गरी हिरासतमा राखिएको आरोप लगाएको हो ।
समितिका अनुसार जन्माष्टमीको मूर्ति विसर्जनका क्रममा रातिको समयमा अध्यक्षले गरेको मनमानीविरुद्ध समितिका केही सदस्य तथा पदाधिकारीले सामाजिक सञ्जालमा उनीविरुद्ध केही कुरा लेख्दा साइबर क्राइमको गराएको मुद्दाले तिनीहरुलाई पक्राउ गरिएको हो ।
समितिका अनुसार घटनापछि विवाद समाधानका लागि बैठक बसेको थियो। पूजा समितिका उपाध्यक्ष मोनु गुप्ताको अध्यक्षतामा बहुमत सदस्यहरूको उपस्थितिमा बसेको बैठकले तीनवटा निर्णय गरेको समितिले जनाएको छ।
बैठकले अध्यक्ष शत्रुधन साहले गरेको कार्यप्रति आपत्ति जनाउँदै उनलाई कारबाही गर्ने निर्णय गरेको समितिको भनाइ छ।
समितिको ब्यानरमा आयोजक संस्था स्टेशन एरिया युवा कमिटीको नामलाई बेवास्ता गरी अध्यक्ष साहले आफ्नो नाम प्रयोग गरेको र त्यसलाई राजनीतिक लाभका लागि प्रयोग गर्न खोजेको समितिको आरोप छ।
पटक–पटक यस्तो कार्य नगर्न आग्रह गर्दा समेत अध्यक्ष साहले आफूहरूको कुरा बेवास्ता गरेको र त्यसको विरोध गर्दा समितिका साथीहरूविरुद्ध मुद्दा लगाएर हिरासतमा बस्न बाध्य बनाइएको समितिले आरोप लगाएको छ।
पूजा समितिले अध्यक्ष शत्रुधन साहलाई आगामी दिनमा समितिको कुनै पनि गतिविधिमा जिम्मेवारी नदिने निर्णय गरेको जनाएको छ। साथै, उनीविरुद्ध तत्काल कानुनी प्रक्रिया अघि बढाउनेसमेत समितिले बताएको छ।
यस्तै, कार्यसमितिका सम्पूर्ण साथीहरू रिहा नभएसम्म पूजा समितिको कुनै पनि हिसाब–किताब सार्वजनिक नगर्ने समितिले जनाएको छ। हिसाब–किताबमा समेत विभिन्न विषय लुकाइएको हुनसक्ने आशंका रहेको समितिको दाबी छ। साथै अध्यक्ष साहले राजनीतिक लाभ लिने गरी पूजाको प्रचार प्रसारको ब्यानरमा नाम सहितको फोटो र चन्दा ठेलीको रसिदमा आफ्नो नाम राखेको आरोप उनीहरुको थियो ।
Discussion about this post