अस्पतालले भर्ना नलिँदा फुटपाथमै बच्चा जन्माएको विषय संसदमा उठ्यो, रास्वपा सांसदहरू आक्रोशित

काठमाडौं/भदौ २५ गते। सप्तरीको राजविराजस्थित गजेन्द्रनारायण सिंह सगरमाथा अस्पतालले भर्ना नलिँदा फुटपाथमै एक महिलाले बच्चा जन्माएको घटना संसद्मा प्रवेश गरेको छ । बिहीबारको प्रतिनिधिसभा बैठकमा सांसदहरूले एक महिलाले फुटपाथमै बच्चा जन्माएको घटनाको छानबिन गर्दै दोषीमाथि कारबाही गर्न माग गरेका छन् ।

रास्वपा सांसद खगेन्द्र कर्णले पैसाको अभावका कारण उपचार नपाएपछि महिलाले अस्पताल कम्पाउन्ड बाहिर सडकमै बच्चा जन्माउनु परेको घटनाको छानबिन गरी दोषीमाथि कारबाही गर्न माग गरे ।

विपन्न, दलित तथा गरिब नागरिकको भरोसाको केन्द्र मानिने सरकारी अस्पतालमै केही सय रुपैयाँको अभावमा सुत्केरी महिला सडकमा पुग्नुले राज्यको स्वास्थ्य प्रणाली र दाबीको वास्तविक कमजोरी उदांगो पारेको उनको भनाइ्र छ ।

कर्णले यस अमानवीय तथा संवेदनशील घटनाप्रति स्वास्थ्यमन्त्रीको गम्भीर ध्यानाकर्षण गराउँदै घटनाको सत्य तथ्य विवरण तत्काल संसदमा जानकारी गराउन माग गरे ।

रास्वपाकै अर्की सांसद अंकिता ठाकुरले पैसा नभएकै कारण गरिब महिलाले सन्तान जन्माउने र आमा बन्ने अधिकारसमेत गुमाउनुपर्ने अवस्था आएको भन्दै आक्रोश व्यक्त गरिन् ।

प्रसव पीडाले छटपटाउँदै अस्पताल पुगेकी महिलालाई उपचार सुरु गर्नुको सट्टा अस्पताल प्रशासनले पैसाको मोलमोलाइ गरेको र पैसा नभएकै कारण चिसो र धुलाम्य सडकमा निकालिदिएको उनको भनाइ छ ।

ठाकुरले नेपालको संविधानको धारा ३५ ले प्रत्येक नागरिकलाई नि:शुल्क आधारभूत स्वास्थ्य सेवाको ग्यारेन्टी गरेको भए पनि गरिब जनताले सरकारी अस्पतालमै प्रसूति सेवा नपाएर सडकमा पुग्नुले संविधान र लोकतन्त्रकै उपहास भएको उल्लेख गरिन् ।

अस्पतालले भर्ना नलिएपछि बबिताकुमारी पासवानले फुटपाथमै बच्चा जन्माएको भिडियो सामाजिक सञ्जालमा सार्वजनिक भएपछि अस्पताल प्रशासनको विरोध भइरहेको छ । अस्पताल प्रशाशनले भने उपचार गर्न आउनेको खर्च कर्मचारीले बेहोर्न नसक्ने जवाफ दिएको छ ।