वासिङ्टन डिसी/भदौ २५ गते। अमेरिकी राष्ट्रपति डोनाल्ड ट्रम्पले गत वर्ष ह्वाइट हाउसका चार जना निकट सहयोगीहरूलाई नगद उपहारस्वरूप हजारौँ डलर प्रदान गरेकाे खुलासा भएकाे छ ।
राष्ट्रपति ट्रम्पको यस कदमले सरकारी कर्मचारीहरूको पारिश्रमिक तथा सुविधासम्बन्धी सङ्घीय आचारसंहिताको उल्लङ्घन भएको हो कि भन्ने गम्भीर प्रश्न खडा गरेको छ।
प्रशासनद्वारा सार्वजनिक गरिएको आर्थिक विवरणअनुसार कार्यकारी सहायक नताली हार्प, सञ्चार सल्लाहकार मार्गो मार्टिन र ओभल अफिस सञ्चालनका उपनिर्देशक चेम्बरलेन ह्यारिसले जनही ४५ हजार अमेरिकी डलर प्राप्त गरेका हुन्।
यस्तै ओभल अफिसको सञ्चालन हेर्ने निर्देशक वाल्ट नौटाले २० हजार डलर प्राप्त गरेका छन्। सो रकमलाई विवरणमा ‘चाडपर्वका लागि नगद उपहार’ भनी उल्लेख गरिएको छ।
सामान्यतया सङ्घीय कर्मचारीहरूलाई सरकारी तलबबाहेक अन्य भुक्तानी वा पारिश्रमिक लिन कानुनतः निषेध गरिएको हुन्छ। वार्षिक १ लाख ५० हजार डलर तलब पाउने हार्प, मार्टिन र ह्यारिसका लागि ४५ हजार डलरको भुक्तानी उनीहरूको वार्षिक पारिश्रमिकको करिब एक-तिहाइ बराबर हो। यस्तै नौटाको वार्षिक पारिश्रमिक १ लाख ७५ हजार डलर रहेको छ।
ह्वाइट हाउसका प्रवक्ता डेभिस इङ्गलले भने यी उपहारहरू आचारसंहिता र नैतिक नियमहरूकै पालना गर्दै दिइएको दाबी गरेका छन्। “यस उपहारको सम्बन्ध ती व्यक्तिहरूको आधिकारिक सरकारी जिम्मेवारीसँग छैन; तसर्थ, कानुनी र नैतिक मापदण्डअनुसार यी पूर्ण रूपमा स्वीकार्य छन्,” इङ्गलले भने। उनले ट्रम्पको सरकारी सेवामा रहँदा होस् या निजी क्षेत्रमा, आफ्नो ‘निकट घेरा’मा रहेका मानिसहरूलाई क्रिसमस उपहार दिने पुराना चलन रहेको बताए।
हार्प र नौटा ट्रम्पका सबैभन्दा निकटतम सहयोगी मानिन्छन्। ‘ट्रुथ सोसल’ खाता व्यवस्थापन गर्ने हार्प ट्रम्पलाई समाचार सामग्री उपलब्ध गराउन पोर्टेबल प्रिन्टर बोकेर हिँड्ने भएकाले ‘ह्युमन प्रिन्टर’ (मानव प्रिन्टर) को उपनामले पनि चिनिन्छिन्।
यस्तै ट्रम्पका व्यक्तिगत सहायक (भ्याले) रहिसकेका नौटा पूर्वराष्ट्रपति कार्यालय बाहिर गोप्य कागजात गैरकानुनी रूपमा राखेको अभियोगमा ट्रम्पसँगै सह-प्रतिवादीसमेत थिए, जुन मुद्दा ट्रम्प पुनः पदमा फर्किएपछि खारेज भएको थियो।
Discussion about this post