बर्दिबासमा फर्स्ट लियो लायन्स महिला फुटबल प्रतियोगिता सुरु, उद्घाटन खेलमा एभरेस्ट एकेडेमी सर्लाही विजयी

बर्दिबास/भदौ २१ गते । बर्दिबासमा शनिबारदेखि फर्स्ट लियो लायन्स महिला फुटबल प्रतियोगिता २०८३ सुरु भएको छ। उत्साह, जोश र उत्कृष्ट खेल प्रदर्शनका बीच सुरु भएको प्रतियोगिताको उद्घाटन खेलमा एभरेस्ट एकेडेमी सर्लाही ले माउन्ट एभरेस्ट खयर्मारा लाई ३–१ गोल अन्तरले पराजित गर्दै सेमिफाइनलमा प्रवेश गरेको छ।

उद्घाटन खेलमा एभरेस्ट एकेडेमी सर्लाहीले उत्कृष्ट खेल प्रदर्शन गर्दै ३ गोल गर्न सफल भयो भने माउन्ट एभरेस्ट खयर्माराले १ गोल फर्काएको थियो। ३–१ को जितसँगै एभरेस्ट एकेडेमी सर्लाहीले प्रतियोगिताको सेमिफाइनलमा आफ्नो स्थान सुरक्षित गरेको हो।

प्रतियोगिताको उद्घाटन मधेश प्रदेश सरकारका श्रम तथा यातायात मन्त्री माननीय शारदा थापाको प्रमुख आतिथ्यमा भएको थियो।

उद्घाटन समारोहमा पूर्व डिस्ट्रिक्ट गभर्नर लायन मधुकर उपाध्याय, प्रथम भाइस डिस्ट्रिक्ट गभर्नर लायन मनोजकुमार सापकोटा, द्वितीय भाइस डिस्ट्रिक्ट गभर्नर लायन किशोरभक्त श्रेष्ठ, पूर्व डिस्ट्रिक्ट गभर्नर लायन शंकर शारदा, प्रमुख जिल्ला कोअर्डिनेटर लायन प्रणिता शर्मा बराल, चिफ कोअर्डिनेटर लायन भुवन नेपाल, जीईटी जिल्ला कोअर्डिनेटर लायन मनिष रमण साह, मार्केटिङ चेयरपर्सन लायन मोहन अर्याल, क्लस्टर चिफ लायन प्रभात साह लगायतको उपस्थिति थियो।

त्यस्तै, एडिसनल क्याबिनेट सचिव लायन रवीन्द्र रिमाल, एडिसनल क्याबिनेट कोषाध्यक्ष लायन विद्याकर प्रसाद साह, रिजन अध्यक्ष लायन प्रदीप सिंह, जोन अध्यक्ष लायन मनिता अर्याल लगायत लायन्स तथा लियो अभियानसँग सम्बन्धित पदाधिकारीहरूको सहभागिता रहेको थियो।

समारोहमा लियो डिस्ट्रिक्ट काउन्सिल ३२५ एफका जिल्ला कोषाध्यक्ष तथा लियो क्लब अफ बर्दिबास समाजका चार्टर अध्यक्ष लियो–लायन निराजनकुमार कुशवाहा र लियो जिल्ला परिषद् ३२५ एफका क्षेत्रीय अध्यक्ष तथा लियो क्लब अफ मिथिला आदर्शका चार्टर अध्यक्ष लियो–लायन दिपेशकुमार सिंहको समेत उपस्थिति रहेको थियो।

यसैगरी, लायन्स क्लब अफ बर्दिबास समाजका निवर्तमान अध्यक्ष लायन उमेशकुमार महतो, एमजेएफ, तत्कालीन अध्यक्ष लायन वैकुण्ठप्रसाद देवकोटा तथा लियो क्लब अफ बर्दिबास समाजका पूर्वअध्यक्ष लियो रजनीशकुमार सिंह लगायतको सहभागिता रहेको थियो।

प्रतियोगिताको पहिलो दिनको खेल खेलाडीहरूको उत्साहजनक प्रदर्शन र दर्शकहरूको उत्साहपूर्ण सहभागिताका कारण रोमाञ्चक बनेको थियो। महिला फुटबल खेलाडीलाई प्रोत्साहन गर्ने उद्देश्यले आयोजना गरिएको प्रतियोगिताले बर्दिबासको खेलकुद वातावरणलाई थप सक्रिय बनाउने अपेक्षा गरिएको छ।

पहिलो खेलमै एभरेस्ट एकेडेमी सर्लाहीले सेमिफाइनलमा स्थान बनाएपछि प्रतियोगिताका आगामी खेलहरू अझ प्रतिस्पर्धात्मक र रोमाञ्चक हुने अपेक्षा गरिएको छ। खेलाडीहरूको मेहनत, उत्कृष्ट प्रदर्शन र दर्शकहरूको अपार साथले प्रतियोगितालाई थप आकर्षक बनाएको आयोजकले जनाएको छ।