जनकपुरधाम जेसिजको बृहत् रक्तदान कार्यक्रम सम्पन्न, २७ जनाले गरे रक्तदान

जनकपुरधाम/भदौ २० गते । जनकपुरधाम जेसिजको आयोजनामा जनकपुरधामस्थित जनकचोकमा आयोजित बृहत् रक्तदान कार्यक्रम सम्पन्न भएको छ। कार्यक्रममा विभिन्न क्षेत्रका युवालगायत सामाजिक अभियन्ता तथा सर्वसाधारणको सहभागिता रहेको थियो। रक्तदान कार्यक्रममा जम्मा २७ जनाले रक्तदान गरेका छन्।

जनकपुरधाम जेसिजले सामाजिक उत्तरदायित्व अन्तर्गत आयोजना गरेको कार्यक्रममा सहभागी रक्तदाताहरूले रक्तदानमार्फत आपत्कालीन अवस्थामा आवश्यक पर्ने बिरामीका लागि सहयोग पुग्ने विश्वास गरिएको छ। रक्तदानलाई मानव सेवासँग जोड्दै जेसिजले युवाहरूमा सामाजिक सेवाप्रतिको भावना विकास गर्ने उद्देश्यले कार्यक्रम आयोजना गरेको जनाएको छ।

कार्यक्रमको उद्घाटन समारोहको अध्यक्षता जनकपुरधाम जेसिजका अध्यक्ष भवेश कुमार झाले गरेका थिए। कार्यक्रममा जनकपुरधाम उद्योग वाणिज्य संघका अध्यक्ष सुरेन्द्र भण्डारी प्रमुख अतिथिका रूपमा उपस्थित थिए।

त्यस्तै कार्यक्रममा राष्ट्रिय स्वतन्त्र पार्टी (रास्वपा) र्‍यापिड एक्सन टिम (र्‍याट) विभागका मधेस प्रदेश प्रमुख अम्भु प्रसाद साह लगायतको उपस्थिति रहेको थियो।

कार्यक्रममा रक्तदानको महत्वबारे चर्चा गर्दै प्रमुख अतिथि सुरेन्द्र भण्डारीले रक्तदानलाई मानव सेवाको महत्वपूर्ण कार्यका रूपमा लिनुपर्ने बताएका थिए। उनले युवाहरू तथा सामाजिक संघसंस्थाहरूले रक्तदानजस्ता मानवीय सेवाका कार्यक्रमलाई निरन्तरता दिनुपर्नेमा जोड दिए। उनले “रक्तदान जीवन बचाउने महत्वपूर्ण मानवीय सेवा हो। हामीले दिएको रगतले कुनै व्यक्तिको जीवन बचाउन सक्छ। त्यसैले युवाहरूलाई रक्तदानप्रति प्रेरित गर्दै यस्ता सामाजिक तथा मानवीय कार्यक्रमलाई निरन्तरता दिन आवश्यक छ।” बताएका छ्न ।

जनकपुरधाम जेसिजका अध्यक्ष भवेश कुमार झाले सामाजिक सेवाका गतिविधिलाई प्राथमिकतामा राख्दै आगामी दिनमा पनि समुदायको आवश्यकता र हितलाई केन्द्रमा राखेर विभिन्न कार्यक्रम सञ्चालन गर्ने प्रतिबद्धता व्यक्त गरेका छन्।

बृहत् रक्तदान कार्यक्रमको संयोजन जेसी दिवाकर झाले गरेका थिए भने कार्यक्रमको सहजीकरण जनकपुरधाम जेसिजका महासचिव जेसी मनोहर ठाकुरले गरेको थियो। कार्यक्रममा जेसिजका पदाधिकारी, सदस्य तथा विभिन्न क्षेत्रका व्यक्तिहरूको सहभागिता रहेको थियो।

रक्तदान कार्यक्रममा २७ जनाले रक्तदान गरेसँगै कार्यक्रमले मानव सेवासँगै सामाजिक जिम्मेवारी निर्वाह गर्ने सन्देश दिएको आयोजकले बताएका छ्न । जेसिजले युवाहरूलाई सामाजिक सेवामा सक्रिय बनाउने उद्देश्यले यस्ता कार्यक्रमलाई आगामी दिनमा समेत निरन्तरता दिने जनाएको छ।