जनकपुरधाम/भदौ १८ गते। जलवायु परिवर्तनका कारण बढ्दो गर्मी, बाढी, पहिरो तथा मौसममा देखिएको अस्वाभाविक परिवर्तनका बीच जनकपुरधाममा हरियाली प्रवर्द्धनका लागि वृक्षारोपण अभियानलाई तीव्रता दिइएको छ।
जनकपुरधाम उपमहानगरपालिकाका नगर प्रमुख मनोजकुमार साहको नेतृत्वमा जनकपुरधाम–१२ स्थित कुवास्थित राजदेवी मन्दिर अगाडिको सार्वजनिक खाली मैदानमा वृक्षारोपण गरिएको हो।
वृक्षारोपण कार्यक्रममा विभिन्न प्रजातिका करिब ५० वटा बिरुवा रोपिएको जनाइएको छ। लामो समयदेखि खाली रहेको सार्वजनिक क्षेत्रलाई हरियालीयुक्त बनाउने उद्देश्यले वृक्षारोपण गरिएको जनकपुरधाम उपमहानगरपालिकाका शिक्षा समिति सदस्य तथा एनप्याब्सन जनकपुरधाम नगर अध्यक्ष दीपक ठाकुरले बताए।
वृक्षारोपण कार्यक्रममा सहभागीहरूले तराई क्षेत्रमा पछिल्लो समय बढ्दै गएको तापक्रम, घट्दो हरियाली र वातावरणीय असन्तुलन न्यूनीकरणका लागि सार्वजनिक स्थानमा वृक्षारोपणलाई अभियानकै रूपमा अघि बढाउनुपर्नेमा जोड दिएका छन्।
उनीहरूले बिरुवा रोपेर मात्र नहुने भन्दै रोपिएका बिरुवाको नियमित संरक्षण र स्याहारमा समेत ध्यान दिनुपर्ने आवश्यकता औँल्याए। सार्वजनिक क्षेत्रलाई हरियालीयुक्त बनाउन स्थानीय तह, संघसंस्था तथा समुदायको सहकार्य आवश्यक रहेको सहभागीहरूको भनाइ थियो।
वृक्षारोपणले वातावरणीय सन्तुलन कायम राख्नुका साथै स्वच्छ हावा, शीतलता र हरियाली प्रवर्द्धनमा महत्वपूर्ण योगदान पुर्याउने विश्वास गरिएको छ। बढ्दो तापक्रम र वातावरणीय जोखिम न्यूनीकरणका लागि शहरी क्षेत्रमा वृक्षारोपणको महत्व अझ बढ्दै गएको छ।
यसअघि पनि नगर प्रमुख साहको नेतृत्वमा जनकपुरधामस्थित ऐतिहासिक तिरहुतिया गाछीमा ठूलो संख्यामा वृक्षारोपण गरिएको थियो। वृक्षारोपण तथा संरक्षणका कारण पछिल्लो समय तिरहुतिया गाछी क्षेत्र थप हरियालीयुक्त बन्दै गएको जनाइएको छ।
जनकपुरधामका सार्वजनिक तथा खुला क्षेत्रलाई क्रमशः हरियालीयुक्त बनाउँदै वातावरण संरक्षणमा योगदान पुर्याउने उद्देश्यले आगामी दिनमा पनि वृक्षारोपण अभियानलाई निरन्तरता दिने अपेक्षा गरिएको छ।
Discussion about this post