सक्कली बिल लिँदा दैनिक १.३३ लाख र बम्परमा १० लाख जित्ने अवसर

काठमाडौं/साउन ५ गते। सरकारले उपभोक्तालाई सक्कली बिल लिन प्रोत्साहित गर्न नगद उपहारसहितको ‘करदाता प्रोत्साहन उपहार कार्यक्रम’ लागू गरेको छ। अर्थ मन्त्रालयले नयाँ कार्यविधि जारी गर्दै बिल लिने उपभोक्तामध्ये दैनिक र पाक्षिक रूपमा गोलाप्रथामार्फत विजेता छनोट गरी नगद पुरस्कार प्रदान गर्ने व्यवस्था गरेको हो।

कार्यक्रमअनुसार नेपालभित्र एक पटकमा १०० रुपैयाँभन्दा बढीको वस्तु वा सेवा खरिद गर्ने उपभोक्ता सहभागी हुन सक्नेछन्। डिजिटल माध्यमबाट गरिएको भुक्तानी स्वतः प्रणालीमा समावेश हुनेछ भने नगद कारोबार गर्नेले बिल नम्बर, विक्रेताको प्यान, बिल जारी मिति, खरिद रकम, भुक्तानीको प्रकार, आफ्नो नाम र मोबाइल नम्बर विभागको प्रणालीमा दर्ता गर्नुपर्नेछ।

आन्तरिक राजस्व विभागले प्रत्येक महिनाको १ र १६ गते स्वचालित प्रणालीबाट विजेता छनोट गर्नेछ। दैनिक एक जना विजेताले १ लाख ३३ हजार ३३४ रुपैयाँ प्राप्त गर्नेछन् भने प्रत्येक पाक्षिक अवधिको बम्पर विजेतालाई १० लाख रुपैयाँ प्रदान गरिनेछ। उपहार रकमबाट कानुनअनुसार २५ प्रतिशत आकस्मिक लाभकर कट्टा हुनेछ।

तर व्यवसायिक प्रयोजनका खरिद, सरकारी निकायको नाममा जारी भएका बिल, विद्युत, टेलिफोन, इन्टरनेट, हवाई टिकट, ढुवानी तथा प्यानबिनाका विक्रेताबाट जारी बिल भने यस योजनामा समावेश हुने छैनन्।

विजेतालाई मोबाइल र इमेलमार्फत जानकारी गराइनेछ। उपहार दाबी गर्न १५ दिनभित्र सक्कल बिल, परिचयपत्र, प्यान र बैंक खाताको विवरणसहित सम्बन्धित आन्तरिक राजस्व कार्यालयमा निवेदन दिनुपर्ने व्यवस्था गरिएको छ। सरकारले यस योजनाले सक्कली बिल लिने संस्कृतिलाई प्रवद्र्धन गर्दै कर प्रणालीलाई थप पारदर्शी र प्रभावकारी बनाउने विश्वास लिएको छ।