जनकपुरधामको शिवचोकमा ‘द चोखोहाउस क्याफे’ आजदेखि सञ्चालनमा

जनकपुरधाम/असार २८ गते। विदेशमा कमाएको पूँजी स्वदेशमै लगानी गर्दै जनकपुरधामको शिवचोकमा ‘द चोखोहाउस क्याफे’ सञ्चालनमा आएको छ। करिब ५० लाख रुपैयाँको लगानीमा सञ्चालनमा ल्याइएको क्याफेले स्वदेशमै रोजगारी सिर्जना गर्दै गुणस्तरीय सेवा प्रदान गर्ने लक्ष्य लिएको छ।

क्याफेका लगानीकर्ता पक्षका अभिभावक रामदेव पुर्वेका अनुसार उनका दुई छोराले युरोपेली देश लक्जेम्बर्गमा काम गरेर कमाएको रकम स्वदेशमै लगानी गर्ने उद्देश्यका साथ दुई जनाको साझेदारीमा क्याफे सञ्चालनमा ल्याएका हुन्।

पेशाले शिक्षक रहेका पुर्वेका तीन छोरामध्ये एक जना इन्जिनियर, एक जना मेडिकल अफिसर हाल लक्जेम्बर्गमा कार्यरत छन्। विदेशमा कमाएको पूँजी आफ्नै देशमा लगानी गरी व्यवसाय सञ्चालन गर्ने सोचअनुसार क्याफे स्थापना गरिएको उनले बताए।

उनले स्वदेशमै व्यवसाय विस्तार गरी युवालाई रोजगारीका अवसर उपलब्ध गराउने उद्देश्य पनि रहेको उल्लेख गरे। क्याफेमा पुर्वेका छोरासँगै उनका एक साथीले पनि साझेदारीमा लगानी गरेका छन्। ती साझेदार पेशाले मेकानिकल इन्जिनियर हुन्।

‘द चोखोहाउस क्याफे’मा विभिन्न प्रकारका आयातित चकलेट, विशेष परिकारका कबाब तथा अन्य खानाका परिकार उपलब्ध रहेको सञ्चालक पक्षले जनाएको छ। पारिवारिक भेटघाट, साथीभाइसँगको जमघट तथा स्वादिष्ट परिकारको अनुभव लिन चाहने ग्राहकका लागि क्याफे आकर्षक गन्तव्य बन्ने विश्वास लिइएको छ।

क्याफे उद्घाटनको अवसरमा ग्राहकलाई विशेष २० प्रतिशत छुटको व्यवस्था गरिएको पनि सञ्चालक पक्षले जनाएको छ।