वीरगञ्ज/असार १४ गते । निको कप महिला टी–२० राष्ट्रिय क्रिकेट प्रतियोगिता २०८३ को उपाधि कोशी प्रदेशले जितेको छ। मधेश प्रदेशको खेलकुद तथा समाज कल्याण मन्त्रालय, मधेश खेलकुद परिषद् तथा नेपाल खेलकुद महासङ्घको संयुक्त आयोजनामा सम्पन्न प्रतियोगिताको फाइनलमा कोशीले नेपाल एपीएफ क्लबलाई ११ रनले पराजित गर्दै च्याम्पियन बन्न सफल भएको हो।
प्रतियोगिताका अधिकांश खेल धनुषाको निर्माणाधीन रामजानकी बहुउद्देश्यीय अन्तर्राष्ट्रिय रङ्गशालामा सञ्चालन गरिएको थियो भने एक सेमिफाइनल र फाइनल खेल वीरगञ्जमा आयोजना गरिएको थियो।
फाइनलमा टस जितेर पहिले ब्याटिङ रोजेको कोशी प्रदेशले निर्धारित २० ओभरमा ४ विकेट गुमाएर ९८ रन बनाएको थियो। टोलीका लागि काजल श्रेष्ठले ५१ बलमा ३८ रनको महत्वपूर्ण इनिङ्स खेलिन्। प्रीसा राना मगरले १६, रुबीना क्षेत्रीले १२ तथा लखिता राजवंशीले १० रनको योगदान दिए।
एपीएफका तर्फबाट सुमन विष्ट, शबनम राई, कविता जोशी र सीता राना मगरले समान एक–एक विकेट लिए।
९९ रनको लक्ष्यसहित मैदान उत्रिएको नेपाल एपीएफ क्लब १९.५ ओभरमा ८७ रनमै अलआउट भएपछि उपाधि कोशी प्रदेशको पोल्टामा पुगेको हो। एपीएफका लागि कविता जोशीले १४ तथा रेवती धामीले १२ रन बनाए पनि अन्य ब्याटरले उल्लेखनीय प्रदर्शन गर्न सकेनन्।
बलिङतर्फ कोशी प्रदेशकी रुबीना क्षेत्रीले ३ विकेट लिएर टोलीको जितमा महत्वपूर्ण भूमिका निभाइन्। रिमा शर्मा र निरु राजवंशीले समान २–२ विकेट लिए भने टिका साह र अप्सारी बेगमले एक–एक विकेट हात पारे।
फाइनलमा उत्कृष्ट प्रदर्शन गरेकी काजल श्रेष्ठ ‘प्लेयर अफ दि म्याच’ घोषित भइन्।
प्रतियोगितामा सातवटै प्रदेशका महिला टोलीका साथै विभागीय टोली नेपाल एपीएफ क्लब गरी आठ टोलीको सहभागिता रहेको थियो। आयोजकका अनुसार प्रतियोगिताले महिला क्रिकेटको स्तर उकास्न, नयाँ खेलाडीलाई अवसर प्रदान गर्न तथा राष्ट्रिय स्तरमा प्रतिस्पर्धात्मक वातावरण सिर्जना गर्न महत्वपूर्ण योगदान पुर्याउने अपेक्षा गरिएको छ।
Discussion about this post