मधेश प्रदेशसभा परिसरमा पुस्तकालय स्थापना, अध्ययन र अनुसन्धानलाई टेवा पुग्ने अपेक्षा

जनकपुरधाम/असार ४ गते। मधेस प्रदेशसभा सचिवालयले प्रदेशसभा परिसरमा स्थापना गरेको पुस्तकालयको बिहीबार औपचारिक उद्घाटन गरिएको छ। पुस्तकालयको उद्घाटन मधेस प्रदेशसभाका सभामुख रामअशिष यादव ले एक कार्यक्रमका बीच गरेका हुन्।

उद्घाटन समारोहलाई सम्बोधन गर्दै सभामुख यादवले पछिल्लो समय पठन संस्कृतिमा आएको कमीलाई मध्यनजर गर्दै अध्ययन, अनुसन्धान तथा ज्ञान अभिवृद्धिलाई प्रोत्साहन गर्ने उद्देश्यले प्रदेशसभा परिसरमै पुस्तकालय स्थापना गरिएको बताए। उनले नीति तथा कानुन निर्माण हुने थलोमा पुस्तकालयको व्यवस्था हुँदा जनप्रतिनिधि, राजनीतिकर्मी तथा सरोकारवालामा अध्ययनप्रतिको रुचि बढ्ने विश्वास व्यक्त गरे।

जनप्रतिनिधिका लागि ऐन–कानुन सम्बन्धी ज्ञान अपरिहार्य रहेको उल्लेख गर्दै उनले पुस्तकालयले कानुनी तथा नीतिगत विषयमा आवश्यक जानकारी प्राप्त गर्न महत्वपूर्ण भूमिका खेल्ने बताए। साथै, पुस्तकालयबाट प्रदेशसभा सदस्य मात्र नभई सञ्चारकर्मी र सर्वसाधारण नागरिकले समेत लाभ लिन सक्ने उनको भनाइ थियो।

पुस्तकालयमा नेपालको संविधान, विभिन्न ऐन–कानुन, मधेस प्रदेशसभाबाट निर्माण गरिएका कानुनसम्बन्धी प्रकाशन, राष्ट्रिय तथा अन्तर्राष्ट्रिय राजनीतिक इतिहाससँग सम्बन्धित सामग्रीका साथै धार्मिक पुस्तकहरूको संग्रह राखिएको सचिवालयले जनाएको छ।

कार्यक्रममा प्रदेशसभाकी उपसभामुख बबिता राउत, प्रदेशसभा सदस्यहरू, सञ्चारकर्मी तथा विभिन्न क्षेत्रका सरोकारवालाहरूको सहभागिता रहेको थियो।

नवनिर्मित पुस्तकालयले प्रदेशसभामा ज्ञानमूलक वातावरण सिर्जना गर्नुका साथै नीति निर्माण प्रक्रियालाई थप प्रभावकारी बनाउन सहयोग पुग्ने अपेक्षा गरिएको छ।