आमसञ्चार प्राधिकरण, मधेश प्रदेशमा दर्ता रहेको अनलाईनको सम्पादकहरु संग अन्तरक्रिया कार्यक्रम सम्पन्न

धनुषा/असार २ गते । आमसञ्चार प्राधिकरण, मधेश प्रदेशमा दर्ता रहेको अनलाईनको सम्पादकहरु संग अन्तरक्रिया कार्यक्रम मंगलबार धनुषाको ढल्केबरस्थित कोमल होटलमा सम्पन्न भएको छ।

आमसञ्चार प्राधिकरण, मधेश प्रदेशको आयोजनामा सञ्चारमाध्यमका सम्पादकहरूको सहभागिता रहेको कार्यक्रममा डिजिटल पत्रकारिताको वर्तमान अवस्था, सञ्चार क्षेत्रका समसामयिक विषय, पत्रकारिताको विश्वसनीयता, सञ्चारमाध्यमको दिगोपना तथा पत्रकारहरूको पेशागत सुरक्षाबारे गहन छलफल गरिएको थियो।

कार्यक्रमका सहभागी सम्पादकहरूले अनलाइन पत्रकारिताको तीव्र विस्तारसँगै देखिएका चुनौतीहरू, सूचना प्रवाहको विश्वसनीयता, सञ्चार संस्थाको आर्थिक दिगोपना, पत्रकारको क्षमता अभिवृद्धि तथा सञ्चार क्षेत्रको संस्थागत विकासका विषयमा आफ्ना धारणा राखेका थिए। साथै, प्रदेशस्तरमा सञ्चार क्षेत्रका समस्या समाधान, पत्रकारका लागि निःशुल्क कानुनी सेवा, सञ्चारमाध्यममैत्री नीति निर्माण तथा सरकारी निकाय र सञ्चारमाध्यमबीच समन्वय वृद्धि गर्न यस्ता कार्यक्रम उपयोगी हुने बताएका थिए।

कार्यक्रमका प्रमुख अतिथि नेपाल पत्रकार महासंघ धनुषाका अध्यक्ष पुरण गुप्ताले पत्रकारिता लोकतन्त्रको महत्वपूर्ण आधारस्तम्भ भएको उल्लेख गर्दै अनलाइन सञ्चारमाध्यमले समाजमा छिटो, सहज र प्रभावकारी रूपमा सूचना प्रवाह गरिरहेको बताए। उनले पत्रकारिताको विश्वसनीयता जोगाइराख्न सत्य, तथ्य र सन्तुलित समाचार सम्प्रेषणमा विशेष ध्यान दिनुपर्ने आवश्यकता औँल्याए।

उनले भने, “अनलाइन पत्रकारिता आजको समयको अपरिहार्य आवश्यकता बनेको छ। यसको प्रभावकारिता र विश्वसनीयता कायम राख्न सञ्चारकर्मीहरूले पेशागत आचारसंहिता र जिम्मेवार पत्रकारितालाई आत्मसात् गर्नुपर्छ। समाजलाई सही र विश्वसनीय सूचना दिनु नै पत्रकारिताको मूल धर्म हो।”

कार्यक्रमका अध्यक्ष तथा आम सञ्चार प्राधिकरण, मधेश प्रदेशका अध्यक्ष जितेन्द्र खड्गाले सञ्चार क्षेत्रको विकास, पत्रकारहरूको क्षमता अभिवृद्धि तथा सञ्चारमाध्यमहरूको संस्थागत सुदृढीकरणका लागि प्राधिकरण निरन्तर सक्रिय रहेको बताए। उनले डिजिटल प्रविधिको विकाससँगै अनलाइन पत्रकारिताको प्रभाव उल्लेखनीय रूपमा बढेको उल्लेख गर्दै पत्रकारितालाई थप जिम्मेवार, मर्यादित र जनउत्तरदायी बनाउन आवश्यक रहेको धारणा व्यक्त गरे।

अध्यक्ष खड्गाले भने, “अनलाइन सञ्चारमाध्यमले नागरिकलाई सूचना पहुँचमा सहजता प्रदान गरेका छन्। तर बढ्दो प्रतिस्पर्धासँगै अपुष्ट र तथ्यहीन सामग्री प्रसारणको जोखिम पनि बढेको छ। त्यसैले सञ्चारमाध्यमले सत्यतथ्यमा आधारित समाचारलाई प्राथमिकता दिनुपर्छ। सञ्चार क्षेत्रको सुदृढीकरणका लागि आवश्यक सहकार्य गर्न प्राधिकरण सदैव तयार छ।”

सञ्चार क्षेत्रको गुणस्तरीय विकास, पत्रकारिताको व्यावसायिकता अभिवृद्धि तथा डिजिटल माध्यममार्फत विश्वसनीय सूचना प्रवाहलाई थप प्रभावकारी बनाउने उद्देश्यले आयोजित उक्त कार्यक्रममा पत्रकार ज्योति झाले स्वागत मन्तव्य व्यक्त गरेकी थिइन्।