चारदिने नमूना युवा संसदीय अभ्यास कार्यक्रम सम्पन्न, लोकतान्त्रिक नेतृत्व विकासमा जोड

धनुषा/जेठ २८ गते । मधेश प्रदेश सभा सचिवालयद्वारा आयोजित चारदिने नमूना युवा संसदीय अभ्यास कार्यक्रम बिहीबार जनकपुरधाममा सम्पन्न भएको छ। लोकतान्त्रिक प्रणाली, संसदीय प्रक्रिया तथा नेतृत्व विकासबारे युवाहरूलाई व्यवहारिक अनुभव प्रदान गर्ने उद्देश्यले सञ्चालन गरिएको कार्यक्रममा प्रदेशका ११ वटा विद्यालयका ५० जना विद्यार्थीहरूको सहभागिता रहेको थियो।

समापन समारोहलाई सम्बोधन गर्दै मधेश प्रदेश सभाका सभामुख रामअशिष यादव ले युवाहरूलाई स्पष्ट लक्ष्य निर्धारण गरी त्यसको प्राप्तिका लागि निरन्तर मेहनत गर्न आग्रह गरे। उनले सफलता हासिल गर्न दृढ संकल्प, योजनाबद्ध कार्यशैली र नियमित अभ्यास आवश्यक हुने बताए।

सभामुख यादवले सकारात्मक सोच, अनुशासन र समर्पण भावनाका साथ अघि बढ्न युवाहरूलाई प्रेरित गर्दै गलत संगतबाट टाढा रहन सुझाव दिए। लोकतान्त्रिक व्यवस्थालाई थप सुदृढ बनाउन जिम्मेवार, सक्षम र सचेत युवा पुस्ताको महत्वपूर्ण भूमिका रहने उनले उल्लेख गरे।

उपसभामुख बबिता कुमारी राउत इशर ले यस्ता अभ्यासमूलक कार्यक्रमले युवामा नेतृत्व क्षमता, तार्किक विश्लेषण, बहस गर्ने कला तथा निर्णय प्रक्रियामा सहभागी हुने सीपको विकास गर्ने बताइन्। लोकतान्त्रिक मूल्य र मान्यतालाई व्यवहारमा उतार्न युवाको सक्रिय सहभागिता आवश्यक रहेको उनको भनाइ थियो।

श्रम तथा यातायात मन्त्री शारदा देवी थापा ले युवाहरूलाई शैक्षिक ज्ञानसँगै सामाजिक तथा राजनीतिक चेतनाको विकासमा पनि ध्यान दिन आग्रह गरिन्। यस्ता कार्यक्रमले भविष्यका नेतृत्वकर्ता तयार पार्नुका साथै जिम्मेवार नागरिक निर्माणमा सहयोग पुग्ने उनले बताइन्।

त्यसैगरी महिला, बालबालिका तथा सामाजिक न्याय समितिकी सभापति रूपा यादव ले लोकतान्त्रिक संस्थाहरूको प्रभावकारी सञ्चालनका लागि युवाको सहभागिता विस्तार गर्नुपर्ने आवश्यकता औँल्याइन्। सार्वजनिक सरोकारका विषयमा युवाहरूले आफ्ना विचार प्रभावकारी रूपमा प्रस्तुत गर्न सक्ने वातावरण निर्माण गर्नुपर्नेमा उनले जोड दिइन्।

प्रदेश सभा सचिवालयका अनुसार कार्यक्रममार्फत सहभागीहरूलाई संसदीय प्रणाली, विधेयक निर्माण प्रक्रिया, छलफल, बहस तथा निर्णय प्रक्रियाबारे व्यवहारिक ज्ञान प्रदान गरिएको थियो। अभ्यासका क्रममा विद्यार्थीहरूले सांसद, मन्त्री तथा सभामुखको भूमिका निर्वाह गर्दै संसदीय गतिविधिको प्रत्यक्ष अनुभव प्राप्त गरेका थिए।

चार दिनसम्म सञ्चालन भएको उक्त कार्यक्रमले सहभागी युवाहरूमा वक्तृत्वकला, नेतृत्व क्षमता, नीति विश्लेषण गर्ने दक्षता तथा लोकतान्त्रिक अभ्यासप्रतिको बुझाइ अभिवृद्धि गर्न महत्वपूर्ण योगदान पुर्‍याएको आयोजकको भनाइ छ।