गिरिजानन्द साह/धनुषा/जेठ १४ गते। संयुक्त राष्ट्रसंघीय जनसंख्या कोष (UNFPA) को सहयोगमा आसमान नेपाल द्वारा सञ्चालित “सशक्त महिला, समृद्ध नेपाल” कार्यक्रम अन्तर्गत सामाजिक मूल्य–मान्यता परिवर्तनका लागि समन्वय अभिवृद्धि गर्ने उद्देश्यले पुरुष च्याम्पियनहरू बीच सिकाइ आदान–प्रदान कार्यक्रम जनकपुरधाममा सम्पन्न भएको छ।
कार्यक्रमको अध्यक्षता आसमान नेपालको बोर्ड सदस्य रेखा यादवले गरेकी थिइन् भने मधेश प्रदेश सभाका सभामुख रामआशिष यादव प्रमुख अतिथिका रूपमा सहभागी भएका थिए। कार्यक्रममा विभिन्न सामाजिक संघसंस्था, सञ्चारकर्मी, युवा प्रतिनिधि तथा सरोकारवालाहरूको उल्लेखनीय उपस्थिति रहेको थियो।
कार्यक्रमलाई सम्बोधन गर्दै प्रमुख अतिथि सभामुख रामआशिष यादवले समाजमा विद्यमान विभेद, असमानता तथा गलत सामाजिक मान्यतालाई परिवर्तन गर्न पुरुषहरूको सक्रिय सहभागिता आवश्यक रहेको बताए। उनले महिला सशक्तीकरण केवल महिलाको मुद्दा नभई समग्र समाजको साझा दायित्व भएको उल्लेख गर्दै पुरुष च्याम्पियनहरूले समुदायमा सकारात्मक सोच र व्यवहार विकास गर्न महत्वपूर्ण भूमिका खेल्न सक्ने धारणा राखे।
उनले समाजमा अझै पनि बालविवाह, लैङ्गिक हिंसा, छुवाछूत तथा महिलाप्रति गरिने विभेदजस्ता समस्या विद्यमान रहेको उल्लेख गर्दै यस्ता कुप्रथाको अन्त्यका लागि सचेतना र सहकार्य आवश्यक रहेको बताए। सभामुख यादवले सामाजिक परिवर्तन एक दिनमा सम्भव नहुने भन्दै निरन्तर संवाद, सिकाई र समुदायमा आधारित अभियानमार्फत मात्रै दीर्घकालीन सुधार सम्भव हुने धारणा व्यक्त गरे।
कार्यक्रममा खेलकुद तथा समाज कल्याण मन्त्रालयकी प्रतिनिधि निर्मला मिश्रले सामाजिक मान्यता परिवर्तनका लागि सरकारी निकाय, गैरसरकारी संस्था र समुदायबीच समन्वय आवश्यक रहेको बताइन्। उनले युवाहरूलाई सामाजिक रूपान्तरण अभियानमा सहभागी गराउन सके समाजमा सकारात्मक प्रभाव पर्ने उल्लेख गरिन्।
कार्यक्रमको सञ्चालन आसमान नेपालकी सरस्वती दनुवारले गरेकी थिइन्। भने कार्यक्रममा खेलकुद तथा समाज कल्याण मन्त्रालयका निर्मला मिश्र, आसमान नेपालका अध्यक्ष नवल यादव, एनएफपीएका प्रतिनिधि प्रीति शर्मा,आसमान नेपालका अजय यादव ,नेपाल पत्रकार महासङ् धनुषाका उपाध्यक्ष अवधेश कामत सीएमसी नेपालका सरोज खड्का, विभिन्न सञ्चार माध्यमका सञ्चारकर्मीहरू र युवाहरूको उपस्थिति रहेको थियो।
कार्यक्रममा विभिन्न सञ्चार माध्यमका सञ्चारकर्मी, युवा प्रतिनिधि तथा सामाजिक अभियन्ताहरूको सक्रिय सहभागिता रहेको थियो। सहभागीहरूले यस्ता कार्यक्रमले सामाजिक रूपान्तरण अभियानलाई थप प्रभावकारी बनाउन मद्दत पुग्ने विश्वास व्यक्त गरेका थिए।
Discussion about this post