व्यवसाय र मानव अधिकारबारे जनकपुरधाममा अन्तरक्रिया सम्पन्न

गिरिजानन्द साह/धनुषा/जेठ १२ गते । व्यवसाय र मानव अधिकार बारे जनकपुरधाममा सोमबार अन्तरक्रिया कार्यक्रम सम्पन्न भएको छ। कार्यक्रम अनौपचारिक क्षेत्र सेवा केन्द्र (इन्सेक) मधेस प्रदेश, जनकपुरधामको आयोजनामा उद्योग वाणिज्य संघको कार्यालयमा सम्पन्न भएको हो।

कार्यक्रमको अध्यक्षता उद्योग वाणिज्य संघका अध्यक्ष सुरेन्द्र भण्डारीले गरेका थिए भने मधेस प्रदेश सरकारका उद्योग, वाणिज्य तथा पर्यटन मन्त्री कनिश पटेल प्रमुख अतिथिका रूपमा सहभागी रहेका थिए।

कार्यक्रमलाई सम्बोधन गर्दै मन्त्री पटेलले प्रदेशमा सरकारलाई सबैभन्दा बढी कर तिर्ने व्यापारीलाई राशिसहित सम्मान गरिने घोषणा गरेका छन्। उनले इमान्दार करदातालाई प्रोत्साहन गर्न प्रदेश सरकारले यस्तो योजना ल्याएको जानकारी दिँदै करदाताको सम्मानले व्यवसायिक वातावरण थप सुदृढ हुने विश्वास व्यक्त गरे।

उनले व्यापारीहरूको अधिकार संरक्षणसँगै राज्यप्रतिको दायित्व पनि उत्तिकै महत्वपूर्ण रहेको उल्लेख गर्दै पारदर्शी कर प्रणालीमार्फत आर्थिक गतिविधि विस्तार गर्न सरकार प्रतिबद्ध रहेको बताए।

अन्तरक्रिया कार्यक्रममा उद्योग बाणिज्य संघ जनकपुरधामको पदाधिकारीहरु,व्यावसायि,नेपाल पत्रकार महासंघ धनुषा का उपाध्यक्ष अवधेश कामत लगायत विभिन्न संघसंस्थाका प्रतिनिधिहरूको सहभागिता रहेको थियो। कार्यक्रममा मानव अधिकारको वर्तमान अवस्था, व्यवसायिक गतिविधिमा मानव अधिकार संरक्षण तथा सामाजिक उत्तरदायित्वका विषयमा छलफल गरिएको थियो।

कार्यक्रमको सञ्चालन पत्रकार कैलाश दासले गरेका थिए। त्यस्तै मानव अधिकार मधेस प्रदेशका राजु पासमानले कार्यक्रमको उद्देश्य तथा मानव अधिकार सम्बन्धी विषयवस्तुमाथि प्रकाश पारेका थिए भने ईन्सेक मधेस प्रदेशका संयोजक बुद्ध नारायण सहनीले व्यावसायि र मानवअधिकार सम्बन्धि छोटो स्लाईड प्रस्तुतिकरण गरेका थिए।