जेठ ११ गते देखि १४ गते सम्म जनकपुरधाममा ‘बृहत योग विज्ञान शिविर २०८३’ हुने

गिरिजानन्द साह/धनुषा/जेठ १० गते । जनकपुरधाममा आगामी जेठ ११ गतेदेखि ‘बृहत योग विज्ञान शिविर २०८३’ आयोजना हुने भएको छ । शिविरबारे जानकारी दिन आइतबार आयोजित पत्रकार सम्मेलनमा आयोजकले योगमार्फत स्वस्थ जीवनशैली प्रवर्द्धन गर्ने उद्देश्यले कार्यक्रम आयोजना गर्न लागिएको जनाएको हो ।

पत्रकार सम्मेलनमा दिइएको जानकारी अनुसार पतञ्जली योग पिठ नेपाल परिवारको आयोजनामा जनकपुरधामको तिरहुतिया गाछीस्थित पवित्र प्राङ्गणमा जेठ ११ गतेदेखि १४ गतेसम्म दैनिक बिहान ५ बजेदेखि ७ बजेसम्म योग शिविर सञ्चालन हुनेछ । शिविरको संयोजक रञ्जना मिश्रले रहेकी छन् ।

शिविरमा हरिद्वारबाट योग ऋषि स्वामी रामदेव महाराजका अनन्य शिष्या साध्वी देवादितीको विशेष उपस्थितिमा योग प्रशिक्षण दिइने आयोजकले जनाएको छ । कार्यक्रममा सहभागीलाई विभिन्न योग अभ्यास, स्वास्थ्यसम्बन्धी जानकारी तथा प्राकृतिक जीवनशैलीबारे प्रशिक्षण प्रदान गरिने बताइएको छ ।

पत्रकार सम्मेलनमा आयोजकहरूले सम्पूर्ण योग प्रेमी, सर्वसाधारण तथा स्वास्थ्यप्रति सचेत नागरिकलाई शिविरमा सहभागी भई योगमार्फत स्वास्थ्य लाभ लिन आग्रह गरेका छन् ।