जनकपुरधामबाट ‘परिवर्तनको आवाज’ परियोजना शुभारम्भ, समावेशी सिर्जनशील क्षेत्र निर्माणमा जोड

धनुषा/जेठ ५ गते। युरोपेली संघको सहयोगमा नेपालमा सांस्कृतिक तथा सिर्जनात्मक क्षेत्रको प्रवर्द्धन गर्ने उद्देश्यले “परिवर्तनको आवाज: सिर्जनशीलता, पहिचान र अभियानमार्फत भविष्य निर्माण” परियोजनाको मधेश प्रदेशस्तरीय शुभारम्भ जनकपुरधाममा सम्पन्न भएको छ।

एफसीए नेपाल, दलित लाइफ्स म्याटर ग्लोबल अलायन्स र शान्ता फाउन्डेशनको साझेदारीमा सञ्चालन गरिएको उक्त परियोजना युरोपेली संघको ७ लाख युरो आर्थिक सहयोगमा सञ्चालन हुने बताइएको छ। परियोजनाले विशेषगरी महिला, दलित, आदिवासी जनजाति तथा यौनिक एवं लैंगिक अल्पसंख्यक समुदायका युवाहरूलाई सांस्कृतिक तथा सिर्जनात्मक क्षेत्रमा अवसर, स्रोत र सुरक्षित कार्य वातावरण उपलब्ध गराउने लक्ष्य लिएको छ।

आयोजकका अनुसार परियोजनाले काठमाडौं उपत्यकासहित मधेश प्रदेश र सुदूरपश्चिम प्रदेशका कला, साहित्य तथा शिल्प क्षेत्रमा सक्रिय युवाहरूलाई आत्मनिर्भर बनाउन तथा संस्कृति र सिर्जनशीलताको प्रवर्द्धनमा योगदान पुर्‍याउने अपेक्षा गरिएको छ।

कार्यक्रममा प्रदेश सरकार, स्थानीय तह, नागरिक समाज, कलाकार, युवा समूह, सञ्चारकर्मी तथा सांस्कृतिक क्षेत्रमा कार्यरत विभिन्न सरोकारवालाको सहभागिता रहेको थियो। सहभागी युवा कलाकारहरूले सिर्जनात्मक क्षेत्रलाई रोजगारी, सामाजिक रूपान्तरण र पहिचानको महत्वपूर्ण माध्यमका रूपमा विकास गर्न आवश्यक सहकार्य र लगानीको आवश्यकता औंल्याएका थिए।

कार्यक्रमका प्रमुख अतिथि मधेश प्रदेश सभाका सभामुख राम आशिष यादवले “परिवर्तनको आवाज” परियोजनाले लोकतान्त्रिक गणतन्त्रलाई संस्थागत गर्ने ऐतिहासिक यात्रामा महत्वपूर्ण योगदान पुर्‍याउने विश्वास व्यक्त गरे। उनले वर्तमान परिस्थितिमा यस्ता परियोजनाको शुभारम्भ समयानुकूल र सार्थक भएको बताए।

त्यसैगरी, जनकपुरधाम उपमहानगरपालिकाका उपप्रमुख किशोरी साहले परियोजनालाई नगरपालिकाको तर्फबाट स्वागत गर्दै परियोजना अवधिभर स्थानीय सरकारको पूर्ण सहयोग रहने प्रतिबद्धता जनाए।

मधेश प्रज्ञा प्रतिष्ठानका अध्यक्ष राम भरोस कापडीले परियोजनामार्फत समावेशिता र पहुँचका सवाललाई थप सशक्त रूपमा उठाउन सकिने विश्वास व्यक्त गर्दै मधेश प्रदेशमा यसको प्रभावकारी कार्यान्वयनको शुभकामना दिए।

नेपालमा समावेशी, सुरक्षित र दिगो सांस्कृतिक तथा सिर्जनात्मक क्षेत्र निर्माणका लागि सरकार, नागरिक समाज र युवा समुदायबीच सहकार्य आवश्यक रहेको निष्कर्षसहित कार्यक्रम सम्पन्न भएको आयोजकले जनाएको छ।