धनुषामा आमा–छोराको शंकास्पद मृत्यु,माइती पक्षद्वारा निष्पक्ष अनुसन्धानको माग

धनुषा/जेठ ३ गते। धनुषामा एक महिला र उनका १८ महिनाका छोरा मृत अवस्थामा फेला परेको घटनाको निष्पक्ष अनुसन्धानको लागि मृतक महिलाको माइती पक्षले माग गरेका छ्न।

गत वैशाख २४ गते धनुषाधाम नगरपालिका–७ किसानपुर निवासी २४ वर्षीया बबिता साह आफ्नै घरमा झुण्डिएको अवस्थामा फेला परेकी थिइन् भने उनका १८ महिनाका छोरा पनि मृत अवस्थामा भेटिएका थिए । जिल्ला प्रहरी कार्यालय धनुषाका अनुसार प्रारम्भिक अनुसन्धानमा बबिताले आफ्ना छोराको हत्या गरी आफूले आत्महत्या गरेको देखिएको जनाएको छ ।

आइतबार जनकपुरधाममा पत्रकार सम्मेलनमा मृतक बबिताकी आमा बिणा देवी साहले छोरी र नातिको हत्या गरिएको दाबी गरिन् । उनले छोरीलाई हत्या गरेर झुण्ड्याइएको तथा नातिको पनि हत्या गरिएको आरोप लगाइन् । उनका अनुसार ज्वाइँ धर्मेन्द्र साह केही दिनअघि मात्रै वैदेशिक रोजगारीबाट घर आएर पुनः विदेश फर्किएका थिए । करिब २० दिनअघि उनी विदेश गएको बताइएको छ ।

बिणा देवी साहले वैशाख २३ गते राति बबिताको आफ्ना ससुरा प्रमोद साह, जेठाजु विरेन्द्र साह, सासु तथा जेठानीसँग विवाद भएको बताइन् । “मेरो छोरी पढेलेखेकी थिइन्, उनी सधैं केही राम्रो गर्न खोज्थिन् । यही कुरा उनीहरूलाई मन पर्दैनथ्यो,” उनले पत्रकार सम्मेलनमा भनिन् ।

घरायसी विषयलाई लिएर विवाद भएको र सोही राति छोरी तथा नातिको हत्या गरिएको उनको आरोप छ । उनले घटनाको निष्पक्ष अनुसन्धान गरी दोषी माथि कारबाही गर्न सम्बन्धित निकायसँग माग गरेकी छन् ।