गिरिजानन्द साह/धनुषा/जेठ २ गते । धनुषाको दोस्रो अधिवेशन शनिबार जनकपुरधाममा सम्पन्न भएको छ। अधिवेशन समाजका अध्यक्ष राधेशरण महतो को सभापतित्वमा सम्पन्न भएको हो। कार्यक्रममा प्रमुख अतिथिका रूपमा समाजका केन्द्रीय उपाध्यक्ष दुर्गा दाहाल सहभागी रहेका थिए।
उद्घाटन समारोहलाई सम्बोधन गर्दै प्रमुख अतिथि दाहालले नेपाल निवृत्त शिक्षक समाजको स्थापना सेवा निवृत्त शिक्षकहरूको अधिकार संरक्षण तथा सरकारले उपलब्ध गराउने सेवा–सुविधा सुनिश्चित गराउने उद्देश्यले गरिएको बताए। उनले लामो समय शिक्षण पेशामा समर्पित शिक्षकहरूले राष्ट्र निर्माणमा महत्वपूर्ण भूमिका खेलेको उल्लेख गर्दै राज्यले उनीहरूको सम्मान, स्वास्थ्य सुरक्षा तथा सामाजिक सुरक्षालाई प्राथमिकतामा राख्नुपर्ने धारणा व्यक्त गरे।
उनले सेवा निवृत्त भएपछि पनि शिक्षकहरूको अनुभव समाज र नयाँ पुस्ताका लागि उपयोगी हुने भएकाले उनीहरूलाई सामाजिक गतिविधिमा सक्रिय राख्न आवश्यक रहेको बताए। उनले शिक्षकहरूले आफ्नो जीवनको महत्वपूर्ण समय शिक्षा क्षेत्रमा खर्च गरेर समाज निर्माणमा पुर्याएको योगदानको उचित मूल्यांकन हुनुपर्ने धारणा राखे।
कार्यक्रमका विशिष्ट अतिथिका रूपमा रहेका समाजका केन्द्रीय सल्लाहकार चुडामणि देवकोटा ले सेवा निवृत्त शिक्षकहरूबीच एकता, सहकार्य र अनुभव आदानप्रदान आवश्यक रहेको बताए। उनले शिक्षकहरू केवल विद्यालयका पाठशालासम्म सीमित नभई समाज परिवर्तनका संवाहक भएको उल्लेख गरे।
त्यस्तै समाजका केन्द्रीय सदस्य रामशिष यादव ले सेवा निवृत्त शिक्षकहरूको सामाजिक सुरक्षाका विषयमा राज्य गम्भीर हुनुपर्नेमा जोड दिए। उनले पेन्सन, स्वास्थ्य उपचार, सामाजिक सम्मान तथा वृद्धावस्थामा आवश्यक सहुलियत उपलब्ध गराउन सम्बन्धित निकायको ध्यानाकर्षण गराए।
कार्यक्रममा अतिथिका रूपमा लाल बाबू हाथी, चुनी शरण यादव तथा दिवाकान्त झा लगायतको उपस्थिति रहेको थियो। वक्ताहरूले शिक्षक पेशालाई राष्ट्र निर्माणको आधारस्तम्भका रूपमा व्याख्या गर्दै सेवा निवृत्त शिक्षकहरूको सम्मान समाजको दायित्व भएको बताए।
उद्घाटन समारोहको सञ्चालन समाजका सचिव भगलु महतो ले गरेका थिए। उनले कार्यक्रमको उद्देश्य, समाजले हालसम्म गरेका गतिविधि तथा आगामी योजनाबारे जानकारी गराएका थिए।
अधिवेशनमा ८० वर्ष उमेर पुगेका सेवा निवृत्त शिक्षकहरूको सम्मान गरिएको थियो। शिक्षा क्षेत्रमा दशकौंसम्म पुर्याएको योगदानको कदर गर्दै उनीहरूलाई दोसल्ला ओढाएर सम्मान गरिएको थियो। सम्मानित शिक्षकहरूले आफूहरूलाई गरिएको सम्मानले थप उत्साहित बनाएको प्रतिक्रिया दिएका थिए।
अधिवेशनमा सहभागी शिक्षकहरूले सेवा निवृत्त शिक्षकहरूबीच आत्मीयता बढाउनुका साथै आपसी सहयोग र सहकार्यलाई मजबुत बनाउने विश्वास व्यक्त गरेका थिए। अधिवेशनमा जिल्लाभरका सेवा निवृत्त शिक्षकहरूको सहभागिता रहेको थियो।
Discussion about this post