धनुषा/बैशाख ५ गते । जनकपुर क्रिकेट एकेडेमीको आयोजनामा आगामी बैशाख १२ गतेदेखि जनकपुरधाममा अन्डर–१२ क्रिकेट टुर्नामेन्ट आयोजना हुने भएको छ। प्रतियोगिताको पूर्वतयारी स्वरूप आज जनकपुरधामस्थित ऐतिहासिक बारहबिघा मैदानमा ट्रफी अनावरण कार्यक्रम सम्पन्न गरिएको छ।
प्रतिनिधि सभा सदस्य तथा राष्ट्रिय स्वतन्त्र पार्टी (रास्वपा)का प्रवक्ता मनिष झाको प्रमुख आतिथ्यतामा आयोजित कार्यक्रममा ट्रफी अनावरण गरिएको हो। सो अवसरमा बोल्दै झाले प्रतियोगिताको सफलताको कामना व्यक्त गर्दै बाल खेलाडीहरूको उज्ज्वल भविष्यका लागि यस्ता प्रतियोगिताले महत्वपूर्ण भूमिका खेल्ने विश्वास व्यक्त गरे। उनले खेल क्षेत्रको विकाससँगै खेलाडीको प्रगति राष्ट्रको गौरवसँग जोडिएको उल्लेख गरे।
टुर्नामेन्टका संयोजक प्रशान्त अरविन्दका अनुसार प्रतियोगिता बारहबिघा मैदानमै सञ्चालन हुने छ र यसमा कुल ६ वटा टिमहरूको सहभागिता रहनेछ। उनले प्रतियोगिताले सानै उमेरदेखि क्रिकेटप्रति आकर्षण बढाउने र प्रतिभा पहिचान गर्न सहयोग पुग्ने बताए।
स्थानीय स्तरमा क्रिकेटको विकास र नयाँ प्रतिभा उत्पादन गर्ने उद्देश्यले आयोजना गरिएको यस टुर्नामेन्टप्रति खेलप्रेमीहरूमा उत्साह देखिएको छ। आयोजकले प्रतियोगितालाई व्यवस्थित र प्रतिस्पर्धात्मक बनाउन आवश्यक सम्पूर्ण तयारी पूरा भइसकेको जनाएको छ।
Discussion about this post