सजिलो बचत तथा ऋण सहकारीको १२औँ साधारण सभामा युवा व्यापारी विजय साह सम्मानित

जनकपुरधाम/पुस २८ गते। सजिलो बचत तथा ऋण सहकारी संस्था लिमिटेडको १२औँ वार्षिक साधारण सभामा जनकपुरधामका युवा व्यापारी विजय साहलाई सम्मान गरिएको छ। सहकारीले उनलाई “उत्कृष्ट युवा व्यवसायी” विधामा सम्मान प्रदान गरेको हो।

मिथिलाञ्चल फर्मासुटिकल्स प्रा. लि. तथा सूर्या ड्रग्स, कदमचोक जनकपुरधामका सञ्चालक रहेका साहले औषधि व्यवसायमार्फत स्थानीय स्तरमा रोजगारी सिर्जना, गुणस्तरीय सेवा प्रवाह र व्यावसायिक इमान्दारितालाई प्राथमिकता दिँदै आएको योगदानको कदरस्वरूप उक्त सम्मान प्रदान गरिएको संस्थाले जनाएको छ।

जनकपुरधाममा सम्पन्न साधारण सभाको प्रमुख अतिथि राष्ट्रिय मुक्ति पार्टी नेपालका केन्द्रीय सचिव संजय चौधरी र सजिलो बचत तथा ऋण सहकारी संस्था लिमिटेडका अध्यक्ष रामहृदय साहले संयुक्त रूपमा विजय साहलाई सम्मान गरेका हुन्।

कार्यक्रमलाई सम्बोधन गर्दै प्रमुख अतिथि चौधरीले युवाहरू व्यवसायमार्फत आत्मनिर्भर बन्दै समाज र राष्ट्रको आर्थिक विकासमा योगदान दिनुपर्ने बताए। उनले सहकारी क्षेत्रले उद्यमशील युवालाई प्रोत्साहन गर्न यस्ता सम्मान कार्यक्रमले सकारात्मक सन्देश दिने उल्लेख गरे।

संस्थाका अध्यक्ष रामहृदय साहले सहकारीले सदस्यहरूको आर्थिक सशक्तीकरणसँगै समाजमा उदाहरणीय कार्य गर्ने व्यक्तिहरूलाई सम्मान गर्दै आएको बताए। उनले विजय साहजस्ता युवा व्यवसायीले स्थानीय अर्थतन्त्रलाई चलायमान बनाउन महत्वपूर्ण भूमिका खेलेको भन्दै आगामी दिनमा पनि सहकारीले यस्ता व्यक्तित्वलाई प्रोत्साहन गर्ने प्रतिबद्धता व्यक्त गरे।

सम्मान ग्रहणपछि प्रतिक्रिया दिँदै युवा व्यापारी विजय साहले प्राप्त सम्मानले आफूलाई थप जिम्मेवार र प्रेरित बनाएको बताए। उनले आगामी दिनमा पनि व्यवसायिक इमान्दारिता कायम राख्दै सेवा विस्तार र सामाजिक उत्तरदायित्वमा सक्रिय रहने प्रतिबद्धता व्यक्त गरे।

साधारण सभामा संस्थाको वार्षिक प्रगति प्रतिवेदन, आर्थिक अवस्था र भावी योजना प्रस्तुत गरिएको थियो भने विभिन्न विषयमा छलफलसमेत गरिएको थियो।