जेसीआई नेपालको ५२ औँ राष्ट्रिय महाधिवेशन पुसको पहिलो साता जनकपुरधाममा हुने,देशैभरका जेसीआईहरु सहभागी हुने

जनकपुरधाम/मंसिर २२ गते। जेसीआई नेपालको ५२ औँ राष्ट्रिय महाधिवेशन पुस पहिलो सातादेखि जनकपुरधाममा हुने भएको छ । जेसीआईका देशभरका १८६ शाखाका पदाधिकारी तथा केही अन्तर्राष्ट्रिय प्रतिनिधिसहित करिब तीन हजार भन्दा बढी सहभागी हुने आयोजकले जनाइएको छ ।

जेसीआई जनकपुरधाम शाखाका अध्यक्ष मुकेश कुमार साहले सोमबार पत्रकार सम्मेलन गरी महाधिवेशनको तयारी अन्तिम चरणमा पुगेको जानकारी गराएका छन् ।

उनका अनुसार पुस ४ गतेदेखि ७ गतेसम्म जनकपुरधामको तिरहुतिया गाछीमा आयोजना हुने महाधिवेशनका लागि संरचनात्मक, प्राविधिक तथा आतिथ्यसम्बन्धी तयारी हुँदैछ ।

राष्ट्रिय महाधिवेशनका निर्देशक तथा जनकपुर जेसिजको पूर्व अध्यक्ष सुधिर पंजियारले महाधिवेशनमा १८६ शाखाबाट प्रतिनिधि आउने र केही अन्तर्राष्ट्रिय व्यक्तित्वहरू पनि सहभागी हुने बताए । उनले भने, “चार दिनसम्म चल्ने महाधिवेशनमा करिब तीन हजार भन्दा बढी अतिथिहरू आउनेछन् । ठूलो संख्यामा सहभागी हुने भएकाले तयारीलाई उच्च प्राथमिकताका साथ अघि बढाइएका छन् ।”

उनका अनुसार जनकपुरधामको सांस्कृतिक, धार्मिक र पर्यटकीय पहिचानलाई प्रवद्र्धन गर्ने उद्देश्यले महाधिवेशन यहाँ आयोजना गरिएको हो । महाधिवेशन सञ्चालनका लागि करिब ३ करोड ५ लाख रुपैयाँ खर्च हुने अनुमान रहेको बताए । उद्घाटन सत्रका लागि प्रमुख अतिथि केही दिनमा चयन हुने पनि निर्देशक पजियारले जानकारी दिए।

जेसीआईका सल्लाहकार रमेश साहले नेपालमा यसअघि यति ठूलो र भव्यताका साथ महाधिवेशन सम्पन्न नभएको दाबी गरे । उनका अनुसार जनकपुरधाममा जेसीआईको महाधिवेशन पाँचौँपटक हुन लागेको हो ।