गिरिजानन्द साह/जनकपुरधाम/कार्तिक १९ गते । कायापलट पुस्तादेखि पुस्ता कार्यक्रमअन्तर्गत वरिष्ठ पत्रकार तथा मधेश प्रज्ञा प्रतिष्ठानका अध्यक्ष श्री राम भरोस कापडीसँग विशेष अनुभव साझेदारी सत्र सम्पन्न भएको छ।
नेपाल पत्रकार महासंघ धनुषासँगको साझेदारीमा र युरोपेली संघ नेपाल तथा अन्तर्राष्ट्रिय सतर्कता नेपालको सहयोगमा आयोजित उक्त सत्रमा कापडीले आफ्नो जीवन यात्रा, पत्रकारिताको अनुभव, संघर्ष र प्रेरणादायी दृष्टिकोणका विषयमा युवा पत्रकार र युवाहरूसँग खुला संवाद गर्नुभयो।
कार्यक्रममा उहाँले पत्रकारितामा आवश्यक नैतिकता, प्रतिबद्धता र सामाजिक जिम्मेवारीबारे जोड दिँदै भन्नुभयो, “पत्रकारिता केवल पेशा होइन, यो समाज परिवर्तनको शक्तिशाली माध्यम हो।” उहाँका ती वाक्यहरूले उपस्थित युवा सहभागीहरूमा उत्साह, आत्मविश्वास र जिम्मेवारीको भाव थप बलियो बनाएको थियो।
सत्रमा सहभागी युवा पत्रकारहरूले कापडीजस्ता अनुभवी व्यक्तित्वसँग प्रत्यक्ष संवाद गर्ने अवसरलाई अमूल्य अनुभवका रूपमा लिएका थिए। उनीहरूले कार्यक्रमले आफूहरूमा सकारात्मक सोच, पेशागत ऊर्जा र उद्देश्यपूर्ण पत्रकारितातर्फको प्रेरणा जगाएको प्रतिक्रिया दिएका छन्।
कायापलटले पुस्तादेखि पुस्ता कार्यक्रममार्फत समाजका अग्रज व्यक्तित्वहरूका अनुभव र ज्ञानलाई नयाँ पुस्तासँग जोड्ने अभियान चलाउँदै आएको छ, जसले सिकाइ, संवाद र रुपान्तरणको संस्कृतिलाई सबल बनाउने आयाम थप्दै गएको छ।
Discussion about this post