सप्तरीमा छुट्टाछुट्टै दुर्घटनामा ३ जनाको मृत्यु

श्रावण ३ गते। सप्तरीमा भएको छुट्टाछुट्टै घटनामा तीनजनाको मृत्यु भएको छ । राजविराज– कंचनपुर हुलाकी सडक खण्ड अन्तर्गत सप्तरीको अग्नीसाइर कृष्णासवरन गाउँपालिका ४ स्थित बनौलीमा शनिबार एक युवक झुण्डिएको अवस्थामा फेला परेको छ । स्थानीय बौवालाल साहको छोरा अन्दाजी बर्ष १९ को अरबिन्द साह झुण्डिएको अवस्थामा मृत फेला परेको हो ।

युवक रुखमा झुण्डिएको देखेपछि स्थानीयले प्रहरीलाई खबर गरेका थिए । घटना स्थलमा इलाका प्रहरी कार्यालय कंचनपुरका प्रमुख डिएसपी माधव प्रसाद काफ्ले नेतृत्वको प्रहरी टोली खटी प्रारम्भिक अनुसन्धान पछि साहको शव परिक्षणका लागि राजविराज पठाइएको वडा नम्बर ४ का अध्यक्ष तेज नारायण यादवले बताए ।

राजबिराज(कंचनपुर हुलाकी सडक खण्ड स्थित एक रुखमा घाँटीमा लुगाको पासो लगाएर झुण्डिएको अवस्था युवक मृत भेटिएको प्रहरीले जनाएको छ । युवकको शव परिक्षणका लागि राजविराज स्थित गजेन्द्रनारायण सिंह अस्पताल राजविराज पठाइएको तथा घटना बारे थप अनुसन्धान भइरहेको इलाका प्रहरी कार्यालय कंचनपुरले जनाएको छ ।

यसैगरी सोही वडा टेङग्री निवासी ७० बर्षिय उर्मिला देवी यादवको करेन्ट लागेर मृत्यु भएको छ । शनिबार विहान ७ बजे खेतमा पानी लगाउने क्रममा मोटरबाट करेन्ट लागेर यादवको मृत्यु भएको प्रहरीले जनाएको छ । यादवको शव परिक्षणका लागि राजविराज पठाइएको तथा घटना बारे अनुसन्धान भइरहेको इलाका प्रहरी कार्यालय कंचनपुरले जनाएको छ ।

यसैगरी राजविराज नगरपालिका–८ स्थित हिमालय टोलमा शनिबार झुण्डिएको अवस्था एक युवतीको शव फेला परेको छ । स्थानीय कृष्ण पोखरेलको घरमा डेरा गरी बस्ने २९ वर्षीया रितु पौडेल आफ्नै कोठाको पंखामा गलामा खादाको पासो लगाई झुण्डिएको अवस्थामा फेला परेको जिल्ला प्रहरी कार्यालय सप्तरीले जनाएको छ । रितु सर्लाही जिल्लाको चन्द्रनगर गाउँपालिका–१, किसानपुरकी स्थायी बासिन्दा हुन् ।