जनकपुरधाममा १८ औं राष्ट्रिय सोतोकान कराँते प्रतियोगिता तथा दोस्रो वडा अध्यक्ष कप सम्पन्न,प्रतियोगिता मधेश प्रदेशको टिम प्रथम

गिरिजानन्द साह/असार १ गते। जनकपुरधाम उप–महानगरपालिका–८ को आयोजना तथा नेपाल सोतोकान कराँते संघ, धनुषाको सहकार्यमा सम्पन्न १८ औं राष्ट्रिय सोतोकान कराँते प्रतियोगिता तथा दोस्रो वडा अध्यक्ष कप भव्य रूपमा सम्पन्न भएको छ। धनुषा जिल्ला खेलकुद विकास समितिको कभर्ड हलमा आयोजित प्रतियोगितामा देशका सातवटै प्रदेश र आयोजक टिम सहित कुल आठ टोलीको सहभागिता रहेको थियो।

प्रतियोगिता मधेश प्रदेशको टिमले प्रथम स्थान, बागमती प्रदेशको टिमले दोस्रो स्थान, तथा गण्डकी प्रदेशको टिमले तेस्रो स्थान हात पार्न सफल भएको छ। खेलाडीहरूले विभिन्न तौल तथा उमेर समूहमा प्रतिस्पर्धा गरेका थिए।

समापन कार्यक्रम जनकपुरधाम उप–महानगरपालिका वडा नं. ८ का वडा अध्यक्ष दिनेश सिंहको अध्यक्षतामा सम्पन्न भयो। कार्यक्रममा प्रमुख अतिथि राष्ट्रिय युवा संघ नेपालका अध्यक्ष क्षितिज थेबे थिए। प्रमुख अतिथि थेबेले कार्यक्रममा बोल्दै भने: “युवा भनेकै राष्ट्रको कर्णधार हुन्। उनीहरूको ऊर्जा, जोश र लगनशीलता समृद्ध राष्ट्र निर्माणको मूल आधार हो। ‘समृद्ध नेपाल, सुखी नेपाली’को राष्ट्रिय अभियानलाई सार्थक बनाउन युवाहरूले नेतृत्व लिनुपर्छ।”

प्रतियोगिताको समापन समारोहमा उत्कृष्ट खेलाडीहरूलाई ट्रफी, प्रमाणपत्र तथा नगद पुरस्कार प्रदान गरिएको थियो। सहभागी खेलाडीहरूको आत्मबल बढाउने उद्देश्यले पुरस्कार वितरण कार्यक्रममा उत्साहजनक सहभागिता देखिएको थियो। आयोजक संस्थाले प्रतियोगिताको सफल आयोजनामा मधेश प्रदेश खेलकुद परिषद्का सदस्य लभ कुमार अधिकारीको महत्वपूर्ण योगदानको चर्चा गर्दै सबै सहयोगी पक्षप्रति आभार व्यक्त गरेको छ। साथै, आयोजकले सुरक्षाकर्मी, स्वयंसेवक, सञ्चारकर्मी तथा स्थानीय समुदायको सक्रिय भूमिका र सहयोगप्रति विशेष धन्यवाद व्यक्त गरेको छ।

समापन कार्यक्रममा जनकपुरधाम उप–महानगरपालिका वडा नं. ८ का वडा अध्यक्ष दिनेश सिंह,नेपाल सोतोकान कराँते संघका प्रशिक्षक तथा नेपाल कराँते संघका वरिष्ठ प्रशिक्षक श्याम शेर्पा,मधेश प्रदेश खेलकुद परिषद्का सदस्य लभ कुमार अधिकारी,दर्जनौं कराँते खेलाडी, सञ्चारकर्मी, प्रशिक्षक र खेलप्रेमी दर्शकहरूको उल्लेखनीय उपस्थिति रहेको थियो। प्रतियोगिता सफलतापूर्वक सम्पन्न भएपछि आयोजक संस्थाले आगामी वर्षहरूमा अझ विस्तारित र अन्तर्राष्ट्रिय स्तरको प्रतियोगिता आयोजना गर्ने प्रतिबद्धता जनाएको छ।