भिठामोडबाट जनकपुरतर्फ आउदै गरेको बस पल्टिँदा २२ जना घाइते, दुईको अवस्था गम्भिर

मङ्सिर ३० गते। भिठामोडबाट जनकपुरतर्फ आउदै गरेको यात्रुबाहक बस महोत्तरीमा दुर्घटना हुँदा २२ जना घाइते भएका छन्। भिठामोडबाट जनकपुरतर्फ आउदै गरेको ना ४ ख १०६९ नम्बरको बस हुलाकी राजमार्गअन्तर्गत जलेश्वर नगरपालिका–६, रातोपुल नजिक अनियन्त्रित भई पुलको रेलिङ तोड्दै पल्टिएको हो।

दुर्घटनामा परेका घाइतेहरुलाई स्थानीयवासी, नेपाल प्रहरी, र सशस्त्र प्रहरीको सहयोगमा उद्धार गरी उपचारका लागि प्रादेशिक अस्पताल जलेश्वर पुर्याइएको छ। घाइतेमध्ये दुई जनाको अवस्था गम्भीर रहेकाले थप उपचारका लागि जनकपुर रेफर गरिएको छ।

जिल्ला प्रहरी कार्यालय महोत्तरीका प्रवक्ता डीएसपी सन्तुलाल प्रसाद जयसवारका अनुसार गम्भीर घाइते भारत परिहारकी २२ वर्षीया सरिता यादव र कोमल राउतलाई जनकपुर पठाइएको छ। अन्य घाइतेहरुको अवस्था सामान्य रहेको र उनीहरुको प्रादेशिक अस्पताल जलेश्वरमै उपचार भइरहेको छ।

बस अनियन्त्रित भएको कारण दुर्घटना भएको प्रहरीले प्रारम्भिक अनुमान गरेको छ। घटनाको थप अनुसन्धान जारी रहेको प्रहरीले जनाएको छ।