जनकपुरधाम/मंसिर २ गते । धनुषा ट्राफिक प्रहरी कार्यालयले ट्राफिक व्यवस्थापन र सवारी सुरक्षालाई सुदृढ बनाउने उद्देश्यका साथ “ई-रिक्सा तथा टेम्पो चालक ट्राफिक प्रशिक्षण” कार्यक्रम सुरु गरेको छ।
यस कार्यक्रमअन्तर्गत जनकपुरधाम उपमहानगरपालिका भित्र सञ्चालनमा रहेका ई-रिक्सा तथा टेम्पो चालकहरूलाई कार्यालयमा उपस्थित गराई ट्राफिक नियमबारे विस्तृत जानकारी प्रदान गरिएको छ। यस प्रशिक्षणमा चालकहरूलाई ट्राफिक नियमको महत्व र पालनाबारे सचेत गराइएको छ भने सडक सुरक्षाका लागि बायाँ लेन च्यापी ई-रिक्सा तथा टेम्पो सञ्चालन गर्नुपर्ने निर्देशन दिइएको छ। साथै जनकपुरधाम उपमहानगरपालिकामा छुट्याइएको ई-रिक्सा स्ट्यान्डमा मात्र पार्किङ गर्नुपर्ने तथा यात्रु चढाउने र ओर्लाउने व्यवस्था अनिवार्य गरिएको छ। प्रशिक्षणमा दुर्घटनाको जोखिम कम गर्न आवश्यक सावधानीका उपायहरू सिकाइएको छ।
यो पहलले जनकपुरधाम क्षेत्रको ट्राफिक व्यवस्थापनमा सुधार ल्याउँदै चालक र यात्रुहरूको सुरक्षा सुनिश्चित गर्ने लक्ष्य राखेको छ। यसले सडकमा नियम पालन र शिष्ट व्यवहारलाई प्रोत्साहन गर्ने अपेक्षा गरिएको छ। धनुषा ट्राफिक प्रहरीको यो प्रयासले सवारी सुरक्षामा नयाँ मानक स्थापित गर्ने र देशभरका अन्य क्षेत्रहरूलाई प्रेरणा दिने विश्वास गरिएको छ।
धनुषा ट्राफिक प्रहरी कार्यालयले सवारी दुर्घटनाबाट हुने मृत्यु दर ५७% ले घटाउन सफल हुँदै ट्राफिक व्यवस्थापनमा नयाँ मानक स्थापित गरेको छ। आर्थिक वर्ष २०८१/८२ को पहिलो चौमासिक प्रगतिबिवरणले यो सफलता ट्राफिक नियमको कडाइ, जनचेतना कार्यक्रम, र प्रभावकारी नेतृत्वको प्रतिफल भएको पुष्टि गरेको छ। गत आव २०८०/०८१ को श्रावणदेखि कार्तिकसम्म ३० जनाको सवारी दुर्घटनामा मृत्यु भएको थियो। तर, चालु आव २०८१/०८२ को यही अवधिमा मृत्युदर घटेर १३ मा झरेको छ। यो सुधारले जनकपुरधाम उपमहानगरपालिकामा ट्राफिक सुरक्षामा प्रगति देखाएको छ।
इन्स्पेक्टर हरि ओलीको नेतृत्वमा धनुषा ट्राफिक प्रहरीले विभिन्न जनचेतनामूलक अभियान तथा सवारी चालकसँग प्रत्यक्ष संवाद सञ्चालन गरिरहेको छ। ट्राफिक नियम पालनको महत्वबारे व्यापक जानकारी दिँदै, “हाम्रो उद्देश्य दण्ड होइन, जीवनको रक्षा गर्नु हो” भन्ने नारा कार्यान्वयनमा ल्याइएको छ। राजस्व संकलनमा ६% को कमी आए पनि दुर्घटना दरमा आएको गिरावट र जनताको जीवन सुरक्षामा दिएको प्राथमिकताले धनुषा ट्राफिक प्रहरीलाई नागरिकका नजरमा विश्वासयोग्य बनाएको छ।
सामान्य जनता र सवारी चालकले ट्राफिक प्रहरीको प्रयासको खुलेर प्रशंसा गरेका छन्। इन्स्पेक्टर हरि ओलीको नेतृत्वले धनुषा ट्राफिक प्रहरीलाई केवल स्थानीय स्तरमै नभई प्रदेश र देशभरका लागि प्रेरणादायी उदाहरणको रूपमा प्रस्तुत गरेको छ। धनुषा ट्राफिक प्रहरीको यो सफलता सुरक्षा र नियम पालनमा आधारित जिम्मेवार नेतृत्वले कस्तो प्रभाव पार्न सक्छ भन्ने उत्कृष्ट उदाहरण हो। “सकारात्मक परिवर्तन नेतृत्वले मात्र सम्भव हुन्छ” भन्ने भनाइलाई व्यवहारमा लागू गर्न इन्स्पेक्टर हरि ओलीको भूमिका उल्लेखनीय छ।
Discussion about this post