चैत २७ गते। यस वर्षको माध्यमिक शिक्षा परीक्षा SEE (एसइई) आज सकिँदै छ । चैत १५ गते सुरु भएको एसइई आज सकिन लागेको हो । परीक्षा फाराम भरेका ३७ हजारभन्दा बढी परीक्षार्थी अनुपस्थित रहेको राष्ट्रिय परीक्षा बोर्ड परीक्षा नियन्त्रण कार्यालयले जनाएको छ ।
५ लाख ४ हजार विद्यार्थीले परीषाका लागि फाराम भरेका थिए ती मध्ये ३७ हजारले परीक्षा नै दिएनन् ।४ लाख ७५ हजार परीक्षार्थीले प्रवेश पत्र लिएका थिए । प्रवेशपत्र लिएकामध्ये पनि ८ हजार भन्दा बढी विद्यार्थी परीक्षा दिन आएनन् ।देशभरबाट ४ लाख ६७ हजारले मात्रै परीक्षा दिएको परीक्षा नियन्त्रक नन्दलाल पौडेलले बताए । अनुपस्थित परीक्षार्थीमध्ये अधिकांश छात्र रहेको बोर्डले जनाएको छ ।
एसईईमा सहभागी हुने विद्यार्थीले कक्षा नौमा रजिस्ट्रेसन फाराम भर्नु पर्छ । त्यसरी फाराम भरेकामध्ये केही विद्यार्थी कक्षा नौको वार्षिक परीक्षा नतिजामा चित्त बुझेन भने सोही कक्षा दोहोर्याउन चाहन्छन्। जसले गर्दा एसईईमा सहभागी हुने तथ्याङ्क घट्छ। त्यस्तै कतिपय निजी स्कुलले कमजोर नतिजा भएका विद्यार्थीलाई आफैँ कक्षा नौमा दोहोर्याउन पनि लगाउने गरेको पौडेलको भनाइ छ।
परीक्षा नियन्त्रक पौडेलका अनुसार केही विद्यार्थी कक्षा १० सम्म आउँदा आफैँ पढाइ छाड्ने गर्छन् भने केहीले आर्थिक अभावका कारण पनि पढाइ छाडेका हुन्छन् । एसईईमा वैकल्पिक धारका विद्यालयबाट पनि परीक्षा फाराम भर्न पाउने व्यवस्था छ।
त्यस्तै महिला तथा प्रौढलाई लक्षित गरेर खोलिएका विद्यालयबाट पनि एसईई परीक्षामा फाराम भराउने गरिएको छ तर यस्ता विद्यालयबाट फाराम भरेकामध्ये केही परीक्षार्थी कम उमेर भएका कारण वा अन्य कारणबाट पनि परीक्षामा अनुपस्थित हुने गरेको पौडेलले बताए। अनुपस्थित परीक्षार्थीमध्ये अधिकांश छात्र रहेको बोर्डले जनाएको छ।
Discussion about this post