देशको अर्थतन्त्र सुधारन्मुखतर्फ छ गलत हल्ला र अफवाहका नफैलाउँ : अर्थमन्त्री महत

जनकपुरधाम/असोज १३ गते। अर्थमन्त्री प्रकाश शरण महतले देशको अर्थतन्त्र सुधारन्मुख रहेको बताएका छ्न।

अर्थमन्त्री महतले देशको अर्थ व्यवस्थामा क्रमिक रुपमा सुधार भइरहेको दावी गरेका छ्न । उनले देशको अर्थतन्त्र सुधारन्मुख रहेको बताउदै गलत हल्ला र अफवाहका कारण मात्र परिस्थती प्रतिकुल बन्न गएको बताएका छन् ।

जनकपुरधाम उद्योग बाणिज्य संघको ५६ औं वार्षिक साधारणसभालाई सम्बोधन गर्दै अर्थमन्त्री महतले गलत अफवाह र हल्लाका कारण पैसा भएका निजि क्षेत्रहरु लगानी नगरेर प्रतिक्षारत रहेकाले पनि यस्तो स्थितीको सृजना भइरहेको बताएका छन् ।

उनले उनले कोभिडको अन्त्य, पर्यटकहरुको आगमनमा वृद्वि भएपछि देशको अवस्था सुधारन्मोख भएको बताए । रेमिटयान्स आएको तर गलत अफवाहका कारण घर र बैंकमै थन्किएकाले पनि व्यापक समस्या जस्तो देखिएको उनको भनाई छ ।

मधेश सहितका प्रदेशहरुमा आवश्यक बजेट विनियोजनमा केहि त्रुटी भएको उनले स्वीकार गरे । साथै जनकपुरधाम उद्योग वाणिज्य संघको नेतृत्व युवा शक्तिले नेतृत्व लिएकोमा मन्त्री डा.महतले खुशी व्यक्त गरे । ‘अहिलेको नेतृत्व केही गरौं भन्ने भावनाले ओतप्रोत हुनुहुन्छ । साथीहरुले थोरै सहज अवस्था भयो भने यहाँ उद्योग व्यवसाय फस्टाउँछ भने, यसले मलाई उत्साहित बनाएको छ ।’

‘हाम्रो अर्थतन्त्रमा समस्या छन्, तर समस्या विस्तारै न्यून हुने बाटोमा अग्रसर छ । परिणाम आउन केही समय लाग्छ, तर सुरुवात भएको छ । अब सकरात्मक बहसको आवश्यकता छ’ मन्त्री डा.महतले भने, ‘अब यहाँ केही हुन्छ भन्ने आत्मविश्वास बढाउनुपर्छ ।’

अब यहाँ केही हुँदैन, व्यवसाय गर्न सकिँदैन भन्ने भाष्यलाई सामाजिक सञ्जाल र विभिन्न व्यक्तिमार्फत् समाजमा फालिएको मन्त्री डा.महतले बताए । उनले भने, ‘सरकारले खर्च अनुशासनमा ल्याएको छ, समयमा खर्च गर्ने बाटोमा हामी अगाडि बढिरहेका छौं । अब देश सकरात्मक बाटोतिर जान्छ । यो भाष्यलाई चिर्नुपर्छ ।’

कार्यक्रममा मन्त्री डा. महतले भने– ‘धेरै ठूलो पूँजी सहकारीमार्फत् प्रवाह भइरहेको छ । तर सहकारीको अवधारणा स्थानीयले केही पूँजी जम्मा गर्ने हो । आफ्नो आवश्यकता पूर्ति गर्ने र लगानी गर्ने पूँजी संकलन गर्ने सहकारीको अवधारणा हो ।’ अर्बौको व्यवसाय गर्नेलाई राष्ट्र बैंकले पनि नियमन गर्दैन । विस्तारै समस्या थपिँदै गएको मन्त्री डा.महतले बताए ।

संघको साधारणसभाको समुदघाटन सत्रमा एमाले नेतृ जुली महतो, जनकपुरधाम उद्योग बाणिज्य संघका अध्यक्ष जिनेन्द्र महासेठ, जनकपुरधाम उपमहानगरपालिकाका प्रमुख मनोज साह, प्रदेश सांसद राम सरोज यादव, दिपेन्द्र ठाकुर सहितकाले जनकपुरधामको विकासका लागि बजेटमा कन्जुसाई नगर्न र महोतरीको जलेश्वर भिठ्ठामोड नाकालाई तेस्रो बन्दरगाहबाट सिधै जोडने मधेशको दोस्रो मुख्य भन्सार नाकाको रुपमा रुपान्तरणका लागि पहल गरिदिन हुन आग्रह गरेका थिए ।