जनकपुरधाम/मंसिर ४ गते । पूर्वराष्ट्रपति डा. रामवरण यादवले नेपालको सामुदायिक शिक्षा सुधारका लागि स्थानीय तह, विद्यालय र समुदायले नेतृत्वदायी भूमिका निर्वाह गर्नुपर्ने बताएका छन्। उनले सार्वजनिक र निजी शिक्षाबीचको विभाजनले शैक्षिक असमानता बढाउँदै लगेको भन्दै यसलाई सुधार गर्न सामूहिक प्रयास आवश्यक रहेको औँल्याएका छन्।
शुक्रबार जनकपुरधाममा प्रिन्सिपल एसोसिएसन अफ नेपाल (प्यान) को राष्ट्रिय महाधिवेशन उद्घाटन गर्दै पूर्वराष्ट्रपति यादवले सामुदायिक शिक्षाको गुणस्तर सुधारमा स्थानीय सरकारको जिम्मेवारी महत्त्वपूर्ण हुने बताए।
उनका अनुसार गाउँपालिका तथा नगरपालिकाले विद्यालयको स्वामित्व ग्रहण गर्दै शिक्षा क्षेत्रप्रति जिम्मेवार नभएसम्म सामुदायिक विद्यालयको अवस्थामा अपेक्षित सुधार सम्भव छैन। विद्यालयको व्यवस्थापन, शैक्षिक गुणस्तर र विद्यार्थीको सिकाइ उपलब्धि सुधारमा स्थानीय तहले सक्रिय भूमिका खेल्नुपर्ने उनले बताए।
यादवले प्रधानाध्यापकलाई सक्षम, जिम्मेवार र नेतृत्वदायी बनाउनुपर्ने आवश्यकता औँल्याउँदै शिक्षकको सम्मान, मर्यादा र पेशागत प्रतिष्ठा कायम राख्नुपर्नेमा जोड दिए। विद्यालयको शैक्षिक वातावरण सुधार गर्न प्रधानाध्यापक र शिक्षकलाई जिम्मेवारीबोध गराउनुका साथै उनीहरूको पेशागत क्षमता अभिवृद्धि गर्नुपर्ने उनको भनाइ थियो।
नेपालको शिक्षा प्रणालीमा अपेक्षित सुधार हुन नसकेकोप्रति चिन्ता व्यक्त गर्दै पूर्वराष्ट्रपति यादवले शिक्षक तथा चिकित्सकजस्ता जिम्मेवार पेशामा संलग्न व्यक्तिहरूले आफ्नो पेशागत नैतिकता, कर्तव्य र जिम्मेवारीप्रति आत्मसमीक्षा गर्नुपर्ने बताए।
उनले सामुदायिक शिक्षालाई प्रभावकारी, गुणस्तरीय र सबैका लागि समान अवसरयुक्त बनाउन सरकार, विद्यालय, शिक्षक, अभिभावक तथा समुदायबीच सहकार्य आवश्यक रहेको सन्देश दिएका छन्।

















Discussion about this post