जनकपुरधाम/मंसिर ४ गते। बालबालिकाको अधिकार संरक्षण, सहभागिता अभिवृद्धि तथा नेतृत्व क्षमता विकास गर्ने उद्देश्यले जनकपुरधाममा प्रदेशस्तरीय बाल भेला तथा बाल क्लब सञ्जाल गठन र क्षमता विकाससम्बन्धी कार्यशाला आयोजना गरिएको छ। साथै कार्यक्रममा वर्ल्ड भिजन,सबल नेपाल, प्लान इन्टरनेसनल,युनिसेफ नेपाल,सेभ द चिल्ड्रेन,ज्वास र बागमती सेवा समाजले सहयोग गरेको छ।
कार्यक्रमको आयोजना खेलकुद तथा समाजकल्याण मन्त्रालय मधेस प्रदेशले गरेको छ भने कार्यक्रममा समन्वय तथा सहयोग महिला,बालबालिका, लैङ्गिक तथा यौनिक अल्पसंख्यक र सामाजिक सुरक्षा मन्त्रालय र राष्ट्रिय बाल अधिकार परिषद्ले गरेको छ।
‘बालापनको रक्षा, भविष्यको सुरक्षा’ भन्ने मूल नाराका साथ मधेश प्रदेश सरकार, खेलकुद तथा समाज कल्याण मन्त्रालयको आयोजनामा मंसिर ४ र ५ गते दुईदिने कार्यशाला सञ्चालन भइरहेको हो।
कार्यक्रमको प्रमुख अतिथि मुख्यमन्त्री तथा मन्त्रिपरिषद्को कार्यालय, मधेश प्रदेशका निमित्त मुख्यसचिव पार्वती शर्मा रहेकी थिइन्। कार्यक्रममा प्लान इन्टरनेशनलकी प्रतिनिधि काजल झा, सेभ द चिल्ड्रेनका मकर सार्की तथा युनिसेफ नेपालका अशोक झाको विशेष उपस्थिति रहेको थियो। कार्यक्रमको अध्यक्षता खेलकुद तथा समाज कल्याण मन्त्रालयका सचिव सुनील कुमार साहले गरेका थिए।
कार्यक्रमलाई सम्बोधन गर्दै प्रमुख अतिथि पार्वती शर्माले बालबालिका राष्ट्रको भविष्य मात्र नभई वर्तमानका महत्वपूर्ण साझेदारसमेत रहेको बताइन्। उनले बालबालिकाको अधिकार सुनिश्चित गर्नु, उनीहरूको विचार र भावनाको सम्मान गर्नु तथा निर्णय प्रक्रियामा अर्थपूर्ण सहभागिता गराउनु राज्यको महत्वपूर्ण दायित्व भएको उल्लेख गरिन्।
उनले बालबालिकाको क्षमता र नेतृत्व विकासका लागि बाल क्लब तथा बाल सञ्जाललाई प्रभावकारी माध्यमका रूपमा विकास गर्नुपर्नेमा जोड दिइन्। बालबालिकालाई आफ्नो अधिकारप्रति सचेत बनाउँदै समाजमा सकारात्मक परिवर्तनका संवाहकका रूपमा अघि बढाउनुपर्ने उनको भनाइ थियो।
कार्यक्रमको अध्यक्षता गर्दै खेलकुद तथा समाज कल्याण मन्त्रालयका सचिव सुनील कुमार साहले बालबालिकाको सर्वाङ्गीण विकासका लागि उनीहरूलाई सुरक्षित, सम्मानजनक र सहभागितामूलक वातावरण उपलब्ध गराउनुपर्ने बताए।
उनले बालबालिकाको क्षमता पहिचान, नेतृत्व विकास तथा आफ्ना समस्या र विचार खुलेर राख्न सक्ने वातावरण निर्माण गर्न बाल क्लब र सञ्जालको महत्वपूर्ण भूमिका रहने उल्लेख गरे। बालबालिकाको अधिकार संरक्षणका लागि सरकार, नागरिक समाज, विकास साझेदार संस्था र सरोकारवाला निकायबीच सहकार्य र समन्वय आवश्यक रहेको उनको भनाइ थियो।
कार्यशालामा प्रदेशस्तरीय बाल क्लब सञ्जाल गठन, बालबालिकाको क्षमता विकास, नेतृत्व सीप अभिवृद्धि तथा बाल अधिकारका विषयमा छलफल र अन्तरक्रिया गरिने जनाइएको छ।
त्यसैगरी बालबालिकालाई संगठित गर्दै उनीहरूको आवाजलाई स्थानीय तहदेखि प्रदेशस्तरसम्म पुर्याउने तथा बाल अधिकार संरक्षणका अभियानमा सक्रिय सहभागिता सुनिश्चित गर्ने उद्देश्यसमेत कार्यक्रमले राखेको छ।
कार्यक्रममा नेपाल सरकार, महिला, बालबालिका तथा ज्येष्ठ नागरिक मन्त्रालय र राष्ट्रिय बाल अधिकार परिषद्को समन्वय तथा युनिसेफ, सेभ द चिल्ड्रेन, प्लान इन्टरनेशनल र वर्ल्ड भिजनलगायत संस्थाको सहयोग रहेको छ।
दुईदिने यस कार्यशालाले मधेश प्रदेशमा बाल अधिकारको संरक्षण, बाल सहभागिता अभिवृद्धि तथा बाल क्लब सञ्जाललाई थप सशक्त बनाउन महत्वपूर्ण योगदान पुर्याउने विश्वास गरिएको छ।

















Discussion about this post