अमावस्याको(औँसी) दिन जन्म भएको व्यक्ति कस्तो हुन्छ र यसको लागि कस्तो उपाय गर्नुपर्छ?

अमावस्याको(औँसी) दिन जो ब्यक्तीको जन्म भएको हुन्छ। ज्योतिष शास्त्रमा प्रत्येक तिथिमा जन्म लिनेहरुको अलग अलग फल बताइएको छ। हामी यो लेखमा जान्नेछौँ कि अमावस्या अर्थात् औँसी तिथिमा जन्म लिएका व्यक्तिहरुको फल कस्तो हुन्छ र यसको लागि कस्तो उपाय गर्नुपर्छ भन्ने विषयमा चर्चा गर्नेछौँ।

ऋषि पाराशरका अनुसार अमावस्याको(औँसी) दिन जो जातकको जन्म भएको हुन्छ, त्यस व्यक्तिको जन्मपछि बिस्तारै घरमा दरिद्रता बढ्दछ। अत: अमावस्याको(औँसी) दिन सन्तानको जन्म भएको छ भने उचित रीतिले शान्ति गर्नुपर्ने विधान रहेको छ।

ज्योतिष शास्त्र अनुसार कुण्डलीमा जब सूर्य र चन्द्रमा एउटै भाव वा घरमा रहेको छ भने अमावस्या(औँसी) दोष हुन्छ। तर यो दोषले अलग अलग भाव अनुसार अलग अलग फल दिन्छ। जस्तै, प्रथम भावमा सूर्य र चन्द्रमा सँगै रहेका छन् भने उसलाई आफ्नो माता पिताबाट कहिले पनि सुख मिल्दैन वा मतभेद रहन्छ। त्यस्तै दशौँ भावमा सूर्य र चन्द्रमा रहनाले जातक शारीरिक रूपले बलियो हुन्छ तर उसले अपमानको सामना गरिरहनुपर्ने हुन्छ।

यो पनि भनाई छ कि अमावस्या(औँसी)मा जन्मेको बच्चा व्याकुल, अस्थिर, कमजोर आत्मबल भएको, अल्छि आदि हुन्छ र यस्ता व्यक्तिले भविष्यमा स्त्री, पुत्र, कुल, धन आदि सम्बन्धी हानिको सामना गर्नुपर्ने हुन्छ। चन्द्रमाले हाम्रो मन र मस्तिष्कमा आफ्नो पूर्ण प्रभाव र नियन्त्रण राखेको हुन्छ। अमावस्या (औँसी)मा चन्द्रमा कमजोर हुनाले व्यक्ति मानसिक रोगले पीडित हुन सक्छ। उसको मन कमजोर हुने र सधैँ दोधारेपन र अस्थिरता रहन्छ।

अमावस्या(औँसी) दोष निवारणका उपायहरु

सधैँ बिहान शुद्ध भएर सूर्यलाई अर्घ दिनुपर्छ।
सूर्य र चन्द्रमासँग सम्बन्धित दान गर्नुपर्छ। जस्तै: गहुँ, रातो र सेतो कपडा, दूध, चामल, खीर, इत्यादि। शिवको आराधना गर्नुपर्छ र शिवलिङ्गमा दूध र पानी मिलाएर अभिषेक गर्नुपर्छ वा पूर्णिमाको व्रत गर्नुपर्छ।