सुरेन्द्र कामती/सिरहा। महोत्तरीको गौशाला नगरपालिका– १० बटौवा टोलका अजयकुमार महतोले श्रीमतीको उपचारमा गम्भीर लापरबाही गर्ने चिकित्सकविरुद्ध कारबाही गर्न माग गर्दै प्रहरी प्रशासन गुहारेका छन् । तर, प्रहरी प्रशासनले जाहेरी दर्ता नगरिदिँदा उनी चिन्तामा परेका छन् । अजयले श्रीमती रिंकुकुमारी सिंहको शल्यक्रिया गर्ने प्रादेशिक अस्पताल सिराहाका चिकित्सक डा. तेजशंकर यादवमाथि कारबाहीको माग गर्दै २५ जेठमा जिल्ला प्रहरी कार्यालय सिराहामा किटानी जाहेरी दिएका छन् । रिंकुको शल्यक्रिया गर्ने क्रममा डा. यादवले गम्भीर लापरबाही गरेका रहेछन् ।
सर्जरी गर्ने क्रममा गज पिसको रगतले लत्पतिएको कपासको डल्ला बाहिर ननिकाल्दै सिलाइएको रहेछ । रगत लागेको कपास पेटभित्रै हुँदा कुहिएर उनको आन्द्रामा असर गर्यो । जसकारण फेरि शल्यक्रिया गरी उनको ३१ सेन्टिमिटर आन्द्रा काटेर फालिएको छ । जसकारण अहिले रिंकु हिँड्डुल गर्ने अवस्थामा छैनन् । शल्यक्रियाका क्रममा चिकित्सकले गरेको लापरबाहीले आफ्नी श्रीमतीलाई जीवनभर मानसिक तनाव हुन सक्ने भन्दै कारबाही र क्षतिपूर्तिको माग गरेको अजयले बताए ।
तर, एक साता पुग्न लाग्दा पनि प्रहरीले जाहेरी दर्ता गरेको छैन । जिल्ला प्रहरी कार्यालय सिराहाका अपराध अनुसन्धान शाखाका इन्चार्ज रामचन्द्र साहले चिकित्सा क्षेत्रको विषय भएकाले जाहेरी दर्ता नगरे पनि आवश्यक अनुसन्धान गरिरहेको दाबी गरे । प्रादेशिक अस्पतालबाट बुझ्ने र शल्यक्रिया गर्ने चिकित्सकलाई बोलाएर सोधपुछको काम भइरहेको भन्दै उनले घटना सम्बन्धमा थप प्रस्ट भएपछि जाहेरी दर्ता गरिने जानकारी दिए । शल्यक्रिया गर्ने डा. तेजशंकर प्रादेशिक अस्पतालका मेडिकल सुपरिटेन्डेन्ट डा. नागेन्द्रप्रसाद यादवका भतिजा हुन् । उनी अहिले भतिजा जोगाउन अर्कै डाक्टरलाई फसाउन लागिपरेका छन् । प्रहरीले प्रादेशिक अस्पताल सिराहालाई पत्र पठाउँदै बिरामीको शल्यक्रिया गर्ने चिकित्सकको नाम मागेको थियो ।
प्रादेशिक अस्पताल सिराहाले २८ जेठमा जिल्ला प्रहरी कार्यालय (अपराध अनुसन्धान शाखा) लाई च.नं. ३३६ मार्फत पठाएको पत्रमा सर्जरी डा. राकेश सिंहले गरेको उल्लेख छ । डा. सिंहलाई प्रहरीले सोधपुछ गरेको छ । उनले आफूले रिंकुकुमारीको सर्जरी नगरेको प्रहरीलाई जानकारी गराएको बताए । ‘जिल्ला प्रशासन कार्यालयमा पनि निवेदन दिएको छु,’ डा. सिंहले भने, ‘मैले रिंकुको सर्जरी गरेको छैन । यसमा मलाई मुछ्न खोजिएको हो । प्रहरीले बोलाएपछि आश्चर्य लाग्यो । मेरो नाम सर्जनमा राखेर फसाउन खोजेको छ । छानबिन हुनुपर्छ ।’ रिंकुकुमारी सिंहको सर्जरी डा. तेजशंकर यादवले गरेको अस्पतालको कागजातबाट पुष्टि हुन्छ । ‘गाइने-ओब्स’ रजिस्ट्ररमा ७८ नम्बरमा रिंकुको नाम र सर्जरी गरेको चिकित्सक, असिस्ट गरेको अर्को चिकित्सक र अप्रेसनमा सहभागी स्वास्थ्यकर्मीको नाम उल्लेख छ ।
जसअनुसार रिंकुको सर्जरी डा. तेजशंकर यादव (रजिस्ट्ररमा छोटोमा अंग्रेजीमा टिएसवाई) लेखिएको छ । असिस्ट गर्ने चिकित्सकमा डा. आरकेएस, सरोज, लालपरी र ममताको नाम उल्लेख छ । डा. तेजशंकर स्त्रीरोग विशेषज्ञ हुन् । मातृ तथा नवजात शिशु सेवा रजिस्ट्ररमा पनि सुत्केरी गराउने स्वास्थ्यकर्मीको नाउँमा डा. तेजशंकर यादव लेखिएको छ । प्रादेशिक अस्पताल सिराहाका सूचना अधिकारी अशोककुमार सिंहले रिंकुको शल्यक्रिया प्रादेशिक अस्पतालमै भए पनि कुन चिकित्सकले गरेको हो भन्ने आफूलाई जानकारी नभएको बताएका छन् । यस विषयमा मेसु डा. नागेन्द्रप्रसाद यादवलाई जानकारी हुन सक्ने भन्दै उनी पन्छिए ।
मेसु डा. यादवसँग कुराकानी गर्न खोज्दा उनी सम्पर्कमा आउन चाहेनन् । साभार : नयाँ पत्रिका
Discussion about this post