२ किस्ता नतिर्दा बैंकले राख्यो ऋणिको घरमै सुरक्षागार्ड

एनआइसी एसिया बैंकले समयमा किस्ता रकम नबुझाएको भन्दै एक ऋणिको घरमा सेक्रेटरी गार्ड पठाएको छ ।

बैंकको यस कार्यको अहिले स्थानीय रुपमा सर्वत्र आलोचना गरिएको छ । बैँकले पैसा उठाउन चालेको यस कदमलाई दादागिरी शैली भन्दै सर्वत्र निन्दा हुन थालेको हो। दमक नगरपालिका ५ का दुर्गाप्रसाद कँडेलको घरमा ३ दिनदेखि बैंकले सुरक्षागार्ड पठाएको बताइएको छ ।

हाल कँडेलको घरको दैलोमा दैनिक बिहान ९ बजेदेखि साँझ ५ बजेसम्म सुरक्षागार्ड राख्ने गरिएको छ । आफूले व्यवसायमा समस्या आएकाले ३ महिना अगाडिदेखि बैंकमा साँवा तथा ब्याज हाल्न नपाएको घरधनी कँडेलले बताए ।

“४ दिन पहिले बैँकले जति हुन्छ त्यति रकम लिएर आउनु भनेको थियो, मसँग भएको १० हजार रुपैयाँ लगेर भौचरमा हालेँ”, घरधनी कँडेलले भने, “त्यही दिनदेखि बैँकले मेरो धितो सुरक्षा गर्न भन्दै एकजना सुरक्षागार्ड नियमित राख्न थाल्यो ।”

बैंकबाट १ करोड रुपैयाँ ऋण लिएकोमा अब साँवा र ब्याज गरी ९७ लाख रुपैयाँ तिर्न बाँकी रहेको उनको भनाइ छ । घरमा पाहुनाहरु आउँदा सुरक्षागार्डले सलाम हान्ने गरेको बताउँदै उनकी श्रीमती चन्द्रकला कँडेलले आफ्नो समाज र आफन्तजनमा बेइज्जत भएको बताइन् ।

बैंकले समयमा साँवा र ब्याज नतिर्दा चिठ्ठी काट्ने, सूचना टाँस्ने र लिलामीको प्रक्रिया गर्नुपर्नेमा घरमै सुरक्षाकर्मी पठाएर आफूहरुलाई बन्धक बनाउँदा स्वतन्त्रपूर्वक बाँच्न पाउने हकबाट बञ्चित गराएको कँडेल परिवारले गुनासो गरेको छ ।

यसबारे नेपाल राष्ट्रिय बैंकका सहायक प्रवक्ता नारायणप्रसाद पौड्यालले एनआईसी मात्रै नभएर कुनैपनि बैंकले ऋणिको घरमा सुरक्षागार्ड राख्नु केन्द्रिय बैंकको नीति विपरीत भएको बताए। आफ्नो सम्पत्तिको सुरक्षा र कर्जा असुलीका अन्य थुप्रै तौरतरिका हुँदाहुँदै पनि बैंकले यसो गर्नु बैँकको नीति विपरीत भएको उनले बताए ।

यसैबीच, एनआइसी एसिया बैंक दमक शाखाका प्रबन्धक तीर्थ प्रधानले दमकमा ऋणिको घरमा बैंकले सुरक्षागार्ड पठाएको बताउँदै यसको सम्पूर्ण जिम्मेवारी बैंकको केन्द्रिय समितिले हेर्ने भएकाले सुरक्षागार्ड किन पठाइयो भन्नेबारे आफू जानकार नभएको प्रतिक्रिया दिए ।