रुपन्देही । लुम्बिनी प्रदेशका मुख्यमन्त्री शङ्कर पोखरेलले राजीनामा दिनुभएको छ ।अविश्वास प्रस्तावमाथि छलफल गर्न बोलाइएको प्रदेशसभाको विशेष अधिवेशन सुरु हुनअघि नै बुधवार मुख्यमन्त्री पोखरेलले राजीनामा दिनुभएको हो ।
एमाले लुम्बिनी प्रदेशसभा संसदीय दलका प्रमुख सचेतक भूमिश्वर ढकालले मुख्यमन्त्री पोखरेलले राजीनामा दिएको बताउनुभयो । मुख्यमन्त्री पोखरेलले प्रदेशप्रमुख अमिक शेरचनलाई भेटेर राजीनामा पत्र बुझाउनुभएको हो । उहाँको राजीनामा स्वीकृत भइसकेको छ ।
यसअघि बसेको एमाले संसदीय दलको बैठकले राजीनामा गर्ने वा अविश्वास प्रस्तावको सामना गर्ने भन्ने निर्णय गर्ने जिम्मा मुख्यमन्त्री पोखरेललाई नै दिने निर्णय गरेको थियो । प्रदेशसभामा मुख्यमन्त्री पोखरेल स्पष्ट अल्पमतमा हुनुहुन्थ्यो । तर, जसपाले पार्टीको निर्णय विपरीत सरकारमा सहभागी भएको भन्दै जसपा सन्तोषकुमार पाण्डेय, विजयबहादुर यादव, सुमन शर्मा रायमाझी र कल्पना पाण्डेय लम्साललाई कारबाही गर्दै पदमुक्त गरेपछि मुख्यमन्त्री पोखरेल अल्पमतमा पर्नुभएको थियो ।
प्रदेशसभामा एमालेका ३८ सांसद छन् भने विपक्षी गठबन्धनमा काँग्रेसका १९, माओवादी केन्द्रका १८, जसपाका ३ र राष्ट्रिय जनमोर्चाका १ गरी ४१ सांसद छन्।प्रदेशसभामा हाल ८० सदस्यीय छ । नयाँ सरकार बनाउन ४१ सांसद आवश्यक पर्छ, जुन बहुमत काँग्रेससहितका विपक्षी गठबन्धनसँग छ ।
विपक्षी गठबन्धनले १९ साउनमा माओवादी केन्द्रका संसदीय दलका नेता कुलप्रसाद केसीलाई मुख्यमन्त्रीमा प्रस्ताव गर्दै मुख्यमन्त्री पोखरेलविरुद्ध तेस्रो पटक अविश्वास प्रस्ताव दर्ता गरेका थिए ।
Discussion about this post