७ वर्षीय भान्जालाई अपहरण गरि फिरौती मागेको आरोपमा मामा पक्राउ

धनुषा,फागुन ९ गते।धनुषामा ७ वर्षीय बालकको अपहरण गरेको आरोपमा पक्राउ परेका मामालाई प्रहरीले सार्वजनिक गरेको छ।

आइतबार नगइराइन नगरपालिका-६ लग्माबाट आफ्नै भान्जाको अपहरण गर्ने मामालाई जिल्ला प्रहरी कार्यालय धनुषाले सार्वजनिक गरेको हो।

शनिबार लग्माका रमेश दासका छोरा चन्दन दासलाई महोत्तरीको पिपरा गाउँपालिका–७ दनौली घर भइ जनकपुरधाम उपमहानगरपालिका-७ मा बस्ने २० वर्षीय रामरतन दास भन्ने लक्ष्मेश्वर कुमार दासले अपहरण गरेको प्रहरी उपरीक्षक (एसपी) प्रकाश रानाभाटले बताए।

शनिबार घरबाट खेल्न निस्केका चन्दनलाई मामा लक्ष्मेश्वरले ललाईफकाई मोटरसाइकलमा बसाएर लगेका थिए।

खेल्न गएको घण्टौंसम्म घर नआएपछि उनको परिवारले खोजी सुरू गरेको थियो।अपरान्ह साढे चारबजे अपिरिचित नम्बरबाट मामा लक्ष्मेश्वरले फोन गरी एक करोड फिरौती मागेका थिए। त्यसपछि बालक अपहरणमा परेको परिवारले जानकारी पाएका थिए।

परिवारले प्रहरी कार्यालयमा उजुरी दिएपछि चन्दनलाई मामा लक्ष्मेश्वरको डेराबाट उद्धार गरेको थियो।

बालकलाई परिवारको जिम्मा लगाइसकिएको र घटनामा संलग्न अन्य दुई जनासमेत पक्राउ गरेको एसपी रानाभाटले बताए।उनीहरूमाथि प्रहरीले थप अनुसन्धान गरिरहेको छ।