स्वावलम्बन लघुवित्त वित्तीय संस्था लिमिटेडले कोरोना भाइरस संक्रमण रोकथाम, नियन्त्रण तथा उपचार कोषमा १ करोड ३२ लाख २८ हजार १२१ सहयोग रकम प्रदान गरेको छ । उक्त रकम कोषको नाममा रहेको राष्ट्रिय वाणिज्य बैंकमा रहेको खातामा जम्मा गरेको कम्पनीका प्रबन्धक राजेन्द्र धितालले जानकारी दिएका हुन ।
यो वाहेक कम्पनीले सात ओटै प्रदेशमा रहेका शाखा/ उपशाखा कार्यालय मार्फत १५० ओटा स्थानीय निकायलाई रू. १० लाख आर्थिक सहयोग उपलब्ध गराएको समेत उनले बताएका छन् ।कोरोना संकट जस्तो विपतको घडिमा कम्पनीले समस्यामा परेका विपन्न ग्राहक सदस्यलाई विभिन्न शाखा कार्यालय मार्फत राहत सामग्री खाद्यान्नसमेत वितरण गरेको प्रबन्धक धितालको भनाइ छ ।
नेपाल राष्ट्र बैंकबाट जारी निर्देशन बमोजिम संस्थागत सामाजिक उत्तरदायित्व कोषमा विसं २०७७ असार मसान्तसम्म बाँकी रहेको रकम थप सहयोग स्वरुप कोरोना संक्रमण रोकथाम, नियन्त्रण तथा उपचार कोषमा जम्मा गरेको बताउँदै उनले उक्त सहयोगबाट न्यून आय भएको साथै अप्ठ्यारोमा परेको वर्ग, समुदायलाई दैनिक उपभोग्य सामग्री वितरणमा सहयोग पुग्ने विश्वास संस्थाले लिएको समेत बताए ।
यस कम्पनीले ग्राहक संरक्षण र संस्थागत सामाजिक उत्तरदायित्व कार्यक्रम अन्तर्गत समय समयमा ग्राहक तथा समुदायको हितका लागि विभिन्न कार्यक्रम तथा प्राकृतिक विपद् व्यवस्थापका लागि विभिन्न राहत प्याकेजहरु उपलब्ध गराउँदै आएको छ ।
राष्ट्रिय स्तरको कार्यक्षेत्र रहको स्वावलम्बन लघुवित्त वित्तीय संस्था लि.ले हाल ६१ जिल्लामा रहेका १४० ओटा शाखा कार्यालय मार्फत २ लाख ५० हजार सदस्य तथा परिवारलाई प्रत्यक्ष लघुवित्त सेवा तथा विभिन्न गैर वित्तीय, दक्षता अभिवृद्धि लगायतका सेवा प्रदान गर्दै आएको छ ।
Discussion about this post