जनकपुर।प्रदेश नम्बर २ को धनुषा जिल्लाको सबैला नगरपालिकास्थित इलाका प्रहरी कार्यालय सबैलाको हिरासतमा रहेका सबैला नगरपालिका वडा नम्बर १२ बस्ने २४ वर्षीय शम्भु सदा मुसहर प्रहरी कार्यालयको शौचालयभित्र झुण्डिएको अवस्थामा फेला परेको धनुषा प्रहरीले जनाएको छ।
हिरासतको शौचालय भित्रै आफैले लगाएको भेस्टले पासो लागेको अवस्थामा मंगलबार राति साढे २ बजे सदा मृत भेटिएको धनुषाका डीएसपी रामेश्वर कार्कीले जानकारी दिए ।उनी ट्याक्टर चालक थिए । गत जेठ १२ गते ट्याक्टर दुर्घटनामा एकजनाको मृत्यु भएपछि उनलाई प्रहरीले पक्राउ गरी हिरासतमा राखेर कारबाही चलाएको थियो ।उनले आत्महत्या किन गरेको हो भन्ने विषयमा अनुसन्धान भइरहेको जिल्ला प्रहरी कार्यालय धनुषाले जनाएको छ ।
प्रहरी हिरासतभित्रै मुसहर मृत भेटिएपछि घटना शंकास्पद रहेको भन्दै बाटो अवरुद्ध गरेर प्रदर्शन गरेको छ। सोही क्रममा इलाका प्रहरी कार्यालय सबैलाको भ्यानमा तोडफोडसमेत गरिएको छ।स्थानीयले बरकुर्वा सडक अवरुद्ध गरी छानविनको माग गर्दै प्रदर्शन गरेका हुन्। तोडफोड गरेपछि प्रहरीले एक राउण्ड हवाई फायर समेत गरेको छ। स्थानीयहरु प्रहरी चौकीमा बाहिरैबाटै ढुंगामुढा गरेपछि बाहिर राखिएको भ्यानमा क्षति पुगेको प्रहरीले जनाएको छ।
Discussion about this post