आज सिराहाका २० जनाले कोरोना लाई जिते

सिरहा ।सिरहाको धनगढीमाई नगरपालिका ११ स्थित छपरारीमा रहेको महेन्द्र गेनाई कोभिड अस्पतालमा उपचाररत २० जना डिस्चार्ज भएका हुन् ।उनीहरुको तेस्रो पीसीआर रिर्पोट नेगेटिभ आएपछि मंगलबार डिस्चार्ज गरिएको हो । उनीहरुलाई सिरहाका प्रमुख जिल्ला अधिकारी सरोजप्रसाद गुरागाई, प्रमुख सेनानी जितेन्द्र गौली, प्रहरी उपरीक्षक उमाप्रसाद चतुर्वेदीले पुष्पगुच्छा तथा संक्रमणमुक्त प्रमाणपत्र दिएर बिदाइ गरेका छन् । आईसोलेसनमा उपचारत २६ जना मध्ये आज (मंगलबार) एकै दिन २० जना कोरोना संक्रमितहरु निको भएर डिस्चार्ज भएको जिल्ला अस्पताल सिरहाका मेसु डा. नागेन्द्र प्रसाद यादवले जानकारी दिएकाछन् ।

कोरोना संक्रमण पुष्टी भएपछि सो अस्पतालको आईसोलेसनमा उपचार भईरहेका मध्ये सिरहाका सखुवानन्कारकट्टी गाउँपालिकाका ३० वर्षिय पुरुष १ जना, लहान नगरपालिकाका १९ देखि ४५ वर्ष उमेरका ८ जना, धनगढीमाई नगरपालिकाका ३४ देखि ३८ वर्षका तीन जना, बरियारपट्टी गाउँपालिकाका १८ देखि ४० वर्ष उमेरका ४ जना, लक्ष्मीपुर पतारी गाउँपालिकाका २० वर्ष पुरुष, नवराजपुर गाउँपालिकाका १८ वर्षिय पुरुष, औरही गाउँपालिकाका ३२ वर्षिय पुरुष, कल्याणपुर नगरपालिकाका २० वर्षिय पुरुष र सप्तरीको रुपनी गाउँपालिकाका ३५ वर्षिय पुरुषलाई डिस्चार्ज गरिएको छ । गत जेठ ३, ५, ६ र १२ गते स्वाब संकलन हुँदा उनीहरु कोरोना संक्रमित भेटिएका थिए । जेठ १२ मा संक्रमित भेटिएकाहरु लहान नगरपालिकाका ८ जनालाई १५ दिनमा, धनगढीमाई नगरपालिकाका दुई जनालाई १५ दिनमा र एक जनालाई ६ दिनमा डिस्चार्ज गरिएको छ ।