✍ गोबिन्द महतो
जनकपुरधाम : प्रादेशिक अस्पताल जनकपुरधाम स्थित पिसिआर प्रयोगशालामा जडित पिसिआर स्वायब परिक्षण पुनः बन्द भएको छ । पिसिआर स्वायव प्रयोगशाला जनकपुर र राष्ट्रिय प्रयोगशाला टेकु काठमाण्डौंमा परिक्षण गर्दा फरक रिपोर्ट आएपछि दोश्रो पिसिआर मेसिन समेत बन्द गर्नुपरेको छ ।
दुई फरक–फरक पिसिआर मेसिनमा शंका उपशंका उत्पन्न हुने रिपोर्ट आएपछि तत्कालका लागि प्रयोगशाला बन्द गरिएको हो । यसअघि राष्ट्रिय प्रयोगशालाले पठाएको मेसिनले भरपर्दो नतिजा नदिएपछि नयाँ मेसिन जडान गरिएको थियो । तर बैशाख २४ मा पत्रकारहरुको स्वायब परिक्षण गर्दा प्रादेशिक अस्पतालको रिपोर्ट निगेटिभ र राष्ट्रिय प्रयोगशालाको रिपोर्ट पोजेटिभ आएपछि पुनः बन्द गर्नुपरेको जनस्वास्थ्य प्रशासक विजय झाले जानकारी दिए
प्रादेशिक अस्पताल जनकपुरमा अहिलेसम्म जाँच गरेका सयभन्दा बढी स्वाब परिक्षणको रिपोर्ट नेगेटिभ आएको थियो । गत बुधवार पुनः फरक नतिजा आएपछि ति सबै स्वायबको नमुना शंकाको घेरामा परेकोले स्वायब परिक्षण बन्द गर्नुपरेको प्रयोगशाला प्रमुख रामविनय साहले जनाए । उनले भने, ‘जनकपुर र काठमाण्डौंमा फरक नतिजा आउनुमा पीसीआर मेसिन प्रमुख कारक हो, कम गुणस्तरको मेसिन जडान हुँदा भरपर्दो नतिजा आउन सकेन, अब हामीले परीक्षण गरेको सबै नतिजामाथि दोश्रो पटक प्रश्न चिन्ह खडा भएको छ, नयाँ मेशीन नआउन्जेल सम्म परिक्षण बन्द हुन्छ ।’
निमित्त निर्देशक रामविनय साहले पत्रकारहरुको स्वायव दुई पटक परीक्षण गर्दा दुवैपटकको नेगेटिभ तर काठमाण्डौंको पोजिटिभ पछि बन्द गर्न बाध्य भएको सुनाए । उनले भने, ‘जनकपुरमा नेगेटिभ काठमाण्डौंमा पोजिटिभ भयो, दुवै ठाउँको रिपोर्टमा फकरपना आएपछि पीसिआर मेसिन भरपर्दो नभएको निष्कर्ष सहित परीक्षण गर्नुको कुनै अर्थ नभएको निष्कर्ष सहित बन्द गर्नुपरेको हो ।’
पहिलो पटक प्राविधिकहरुले जडान गरेपनि पछिल्लो पटक पीसीआर मेसिन जडान गर्न प्रयोशालाका निर्देशक डा. रुना झा स्वयं जनकपुर पुगेकी थिइन् । निर्देशक स्वयं आफैं आएर मेसिन जडान गर्न लगाएपछि पछिल्लो भन्दा अहिलेको मेसिन भरपर्दो हुने विश्वास लिइएको थियो । तर पछिल्लो पटक समेत पहिलेको जस्तौ अवस्था आयो
प्रादेशिक अस्पताल जनकपुरका सेवानिवृत्त वरिष्ठ ल्याब टेक्निसियन अरुण कुमार मल्लिकले नमुना संकलन, परीक्षण प्रक्रिया, मेसिनको गुणस्तर र प्राविधिकको कार्य क्षमताले समेत नतिजा फरक पर्ने सक्ने बताए । उनले भने, ‘यहाँ ठीक र बेठिक भन्नु उचित हैन, नमुना संकलन देखि परिक्षण र उपकरणको क्षमताको कुरा समेत आउँछ, त्यसैले कुनैपनि निचोडमा पुग्नु भन्दा पहिले समस्याको यकिन आवश्यक छ ।’
Discussion about this post